Elimizde jumys kúshine degen suranys turaqty túrde ósip otyr. Bıyldyń birinshi toqsanynda hh.kz platformasynda 120 myńnan astam belsendi jumys orny usynylyp, ótken jyldyń sáıkes kezeńimen salystyrǵanda 20%-ǵa kóp boldy, dep habarlaıdy Egemen.kz.
41 jáne 25 paıyz kórsetkishimen Almaty men Astana bos jumys ornynyń sany boıynsha kóshbasshylyq pozısııany jalǵastyryp keledi. Jumys berýshiniń belsendiligi joǵary óńirlerdiń qataryna Qaraǵandy, Shymkent jáne Qostanaı kirdi. Basqa da qalalarda bos oryndar sany aıtarlyqtaı artty. Usynys Astanada 34%-ǵa jetti, Shymkentte – 26%, Qostanaıda – 22%, Almatyda – 17% ósim baıqaldy. Bos oryndar sany Aqtóbede 14%-ǵa, Atyraý men Oralda 7%-ǵa, Pavlodar men О́skemende 6%-ǵa birshama ulǵaıdy.
Jumysshylardyń jartysy alatyn jalaqy deńgeıin kórsetetindikten, medıandy jalaqy ortasha jalaqyǵa qaraǵanda eńbekti tóleýdiń obektıvti kórsetkishi bolyp sanalady. Osy ýaqytta elimiz boıynsha usynylyp otyrǵan medıandy jalaqy 308 088 teńgeni qurady, ıaǵnı ótken jylmen salystyrǵanda 12%-ǵa kóterilgen. Menedjment, marketıng, strategııa, ınvestısııa jáne konsaltıng salalarynda jalaqy edáýir joǵary. Barlyq salalarda usynylǵan ortasha jalaqynyń ósýi baıqalady.
Sondaı-aq birinshi toqsanda HeadHunter platformasynda 900 myńnan astam (ótken jylmen salystyrǵanda 62%-ǵa kóp) túıindeme jarııalanǵan. Túıindemeler ásirese jumysshy maman men kólik salasy qyzmetkerlerinen kóptep túsýde, bul osy salalardaǵy jumys oryndaryna suranys artqanyn kórsetedi.