Jańa Salyq kodeksi qoldanysqa engizilgennen keıin Qazaqstanda «sán-saltanat salyǵy» paıda bolady. Ony qymbat jyljymaıtyn múlik, kólik, teńiz kemeleri men ushaqtardyń, sondaı-aq qymbat alkogoldik sýsyndar men sıgaralardyń ıeleri tóleıdi, dep habarlaıdy Egemen.kz.
«Biz taýarlardyń jekelegen sanattaryna «sán-saltanat salyǵy» dep atalatyn joǵary salyq salýdy usynamyz. Ol úshin jyljymaıtyn múlik quny 450 mln teńgeden asatyn bolsa, múlik salyǵynyń mólsherlemesin ulǵaıtý usynylady.
Sondaı-aq quny 75 mln teńgeden asatyn jeńil avto kólikterge, sondaı-aq qymbat teńiz kemeleri men ushý apparattaryna aksızder engizý josparlanýda», dedi Májilistiń jalpy otyrysynda jańa Salyq kodeksiniń jobasyn birinshi oqylymda talqylaý kezinde Premer-mınıstrdiń orynbasary – ulttyq ekonomıka mınıstri Serik Jumanǵarın.
Sondaı-aq ádildik úshin qymbat alkogoldik sýsyndar men sıgaralarǵa 10% aksızder usynylady.