Búgin Almatyda ótken baspasóz máslıhatynda qajylyq saparlarǵa nıettengen adamdarǵa alaıaqtardan abaı bolý kerektigi eskertildi, dep jazady Egemen.kz.
Qudaıdyń joly desek te, Almatyda dinı saparlarǵa baılanysty alaıaqtyq jıileı bastaǵan. Bul týraly óńirlik kommýnıkasııalar qyzmetiniń baspasóz alańynda Qazaqstan týrıstik qaýymdastyǵynyń dırektory Rashıda Sháıkenova málimdedi.
«Senim men aıaýshylyq adamdardyń eń álsiz tusy. Osyny paıdalanatyn alaıaqtar meshitter men týroperatorlardyń atyn jamylyp, sadaqa jınaıdy, naqty aqparat bermeı, jeke shottarǵa aqsha aýdarýdy suraıdy», deıdi R.Shaıkenova.
Jalpy keńinen taralǵan alaıaqtyq tásilderine jalǵan vızalar jasaý, joq bıletterdi satý men joq turǵyn úılerdi saýdalaý jatady. Álbette, munyń saldary aýyr, óıtkeni aldanǵan el aqshasynan aıyrylyp qana qoımaı, shekaradan da óte almaıdy.
Shaıkenova qajylyqty uıymdastyrý jónindegi qyzmetterdi Qazaqstan musylmandary dinı basqarmasynda akkredıttelgen kompanııalar ǵana atqarýǵa quqyly ekendigin eske sala kele: «Búginde osyndaı 15 kompanııa bar, olardyń tizimi Qazaqstan musylmandary Dinı basqarmasynyń resmı saıtynda ornalastyrylǵan. Ýmra úshin seriktes tańdaǵanda senimdiligine, sharttardyń ashyqtyǵy men zańdy jaýapkershilikke nazar aýdarý kerek», dedi.
Almaty polısııa departamenti tergeý basqarmasy bastyǵynyń orynbasary Qaırat Qasymbaevtyń aıtýynsha, barlyq shaǵymdar jeke qaralady. Qajylyqqa jalǵan deldaldardyń kesirinen ushyp kete almaǵan jekelegen jaǵdaılar tergelip, kináliler jaýapqa tartylady.
Almaty polısııasy memlekettik jáne Dinı mekemelermen, týrıstik qaýymdastyqtarmen belsendi túrde, birige qımyldaıdy.
Sondyqtan spıkerler týroperatorlar týraly málimetterdi aldyn ala tekserip, beıtanys adamdarǵa qarajat aýdarmaýǵa, alaıaqtyqtyń izi baıqalǵan boıda polısııaǵa júginýge keńes berip otyr.