Mańǵystaý oblysyndaǵy Aqjigit aýylynda 8 sáýirde qaza bolǵan 17 jastaǵy jasóspirimniń ólimine qatysty tergeý amaldary júrgizilip jatyr, dep habarlaıdy Egemen.kz.
Basylymnyń jazýynsha, polısııanyń jasóspirimniń ólimine sebep bolǵan kúdiktini kúni keshe ǵana ustaǵany belgili boldy.
Qaıǵyly oqıǵa sáýirdiń 8-i kúni bolǵan. Marqumnyń týystaryna onyń qulap, jaraqat alǵanyn, sonyń saldarynan qaıtys bolǵany aıtylǵan. Alaıda jasósprimniń otbasy ony zorlyq-zombylyq qurbany boldy dep esepteıtindikten, ádil tergeýdi talap etip otyr.
Mańǵystaý polısııa departamenti baspasóz qyzmetiniń málimetinshe, kúdikti – sol aýyldyń 20 jastaǵy turǵyny.
«Buǵan deıin kúdiktige izdeý jarııalanǵan bolatyn, habarlama oblystyń barlyq aýdanyna taratylǵan. Qazir ol ustalyp, ýaqytsha ustaý ızolıatoryna qamaldy. Tergeý QR Qylmystyq kodeksiniń 106-babynyń 3-bóligi «Densaýlyqqa qasaqana aýyr zııan keltirý, jábirlenýshiniń ólimine ákep soǵý» boıynsha júrgizilýde», - delingen habarlamada.
Qylmystyń saralanýy ózgermese, jas jigit 8 jyldan 12 jylǵa deıin bas bostandyǵynan aıyrylýy múmkin.
Oqıǵanyń mán-jaıyn tergeýshiler muqııat zerttep jatyr.