Búgin elimizde «Kúsh leksııasy» jalpyrespýblıkalyq jobasy bastaldy. Onyń alǵashqy aprobasııasy Túrkistan oblysynda ótýde. Atap aıtqanda, Túrkistan qalasyndaǵy Farab kitaphanasynda qoǵam men jastarǵa arnalǵan tyń formattaǵy «Kúsh leksııasy» synnan ótti.
Jobanyń avtory ári jetekshisi – ulttyq sport túrleri men kúsh mádenıetin zertteýshi, «Baluan tas» qurylymynyń negizin qalaýshy Abylaıhan Qalnazarov.
«Kúsh leksııasy» – jastardyń rýhyn kóterip, ómirlik ustanymyn nyǵaıtýǵa, ulttyq bolmys pen batyrlyq qundylyqtardy dáripteýge baǵyttalǵan jańa motıvasııalyq platforma. Joba azamattyq bastama retinde júzege asyp otyr jáne Qazaqstannyń 20 óńirin qamtýdy kózdeıdi. Ol «Baluan tas» ulttyq sport túrleri jáne mádenıeti akademııasynyń iske qosyp otyrǵan ekinshi jobasy.
«Bul – qoǵamǵa, ásirese talapty ári sportpen shuǵyldanatyn jastarǵa arnalǵan buryn-sońdy bolmaǵan erekshe joba. Basty maqsatymyz – qazaq tarıhyndaǵy memleketshil tulǵalar men batyr-balýandardyń taǵylymdy ómir jolyn búgingi urpaqqa úlgi etý. Bul – shynaıy erlik pen eńbektiń, ulttyq rýh pen tabandylyqtyń dárisi», – dedi Abylaıhan Qalnazarov.
Jobanyń negizgi mindetteri:
◉ Ulttyq batyrlyq pen kúsh mádenıetin jańǵyrtý;
◉ Jastarǵa shynaıy motıvasııa berý;
◉ Sportshy býynǵa baǵyttalǵan arnaıy dárister ótkizý;
◉ Ulttyq qundylyqtardy qazirgi zamanmen sabaqtastyrý;
◉ Ashyq dıalog alańyn qalyptastyrý;
◉ Sıfrlyq jáne medıa-kontent jasaý arqyly keń aýdıtorııany qamtý.
Alǵashqy nátıjeler men aldaǵy josparlar:
Joba aıasynda 2025 jyldyń sońyna deıin:
◉ 20 óńirde motıvasııalyq leksııalar uıymdastyrylady;
◉ 300 myńnan astam jas qatysatyn bolady;
◉ 100-den astam tanymal tulǵa spıker retinde shaqyrylady;
◉ Áleýmettik jeliler men medıa arqyly mıllıonǵa jýyq aýdıtorııany qamtıtyn kontent usynylady.
Sonymen qatar jobanyń iske asýyna alǵash qoldaý bildirip otyrǵan Farab kitaphanasymen ózara yntymaqtastyq týraly memorandýmǵa qol qoıyldy. Bul áriptestik aldaǵy ýaqytta mádenı-aǵartýshylyq baǵyttaǵy jańa jobalarmen jalǵasyn tappaq. Taǵy bir mańyzdy tus, «Baluan tas» qurylymy respýblıkalyq deńgeıde áreket etetin uıym bolǵandyqtan, onyń Túrkistan qalasy fılıaly jetekshiligine jergilikti ǵalym, PhD doktor Qaınar Qaldybaı bekitildi.
Aıta keteıik, «Baluan tas» ulttyq sport túrleri jáne mádenıeti akademııasy – qazaq halqynyń barlyq dástúrli sportyn saqtaý, damytý jáne halyqaralyq deńgeıde tanymal etýge baǵyttalǵan ınnovasııalyq ortalyq. Bul uıym ulttyq sport túrleriniń fızıkalyq, rýhanı-mádenı jáne zııatkerlik qundylyqtaryn zerttep zerdelep, bolashaq urpaqqa jetkizýdi jáne sport arqyly eldik rýhty kúsheıtýdi kózdeıdi. Ol 2025 jyly 17 naýryzynda ulttyq sport túrleri zertteýshileri men ǵalymdarynyń bastamasymen Astana qalasynda qurylyp, óz jumysyn bastady. Quryltaıshysy jáne jetekshisi Abylaıhan Qalnazarov.