Amerıkalyq kásipker Bleık Maıkoskı Argentınada demalyp júrgende, kóptegen kedeı balalardyń kóshede jalańaıaq júrgenin baıqaıdy. Osy kórinis oǵan erekshe áser etip, kásibin qaıyrymdylyqpen ushtastyrǵan.
Sonda qalaı deısiz ǵoı? Bleık oılana kele aıaqkıim óndiretin «Toms Shoes» kompanııasyn qurady. Kásiporyn óniminiń aıtarlyqtaı ereksheligi joq. Biraq olardyń qaǵıdasy talaı jandy tańǵaldyrdy. Máselen, siz bir aıaqkıim satyp alsańyz, dál sondaı aıaqkıim bir muqtaj balaǵa syılanady. Úsheý alsańyz, úsh balany qýantasyz. Bylaısha aıtqanda, saýda jasap saýap jınaısyz. Osy erejeni myqtap ustanǵan «Toms Shoes» kompanııasy 2012 jylǵa qaraı 40 eldiń mıllıonnan astam balasyna tegin aıaqkıimdi tartý etken.