Keıingi jyldary jekelegen zertteýlerdi bylaı qoıǵanda, Alash taqyrybynyń shet jaǵasy kórkem shyǵarmalarda kórinis taba bastaǵany qýantady.
Máselen, byltyr «Folıant» baspasynan tanymal aqyn Ábýbákir Qaırannyń «Baıtaq» atty kitaby shyqty. Onda aqynnyń óleńderimen qatar, «Semeı» jáne «Arzý» poemalary jarııalanǵan. «Semeı» poemasynyń «Alashorda» atty bir taraýy biz sóz etken taqyrypqa arnalsa, «Arzý» atty lırıkalyq poema tutasymen Alash taqyrybyn arqaý etipti.
2024 jyly jaryq kórgen taǵy bir esse formatyndaǵy kitap – belgili jazýshy Dıdar Amantaıdyń «Ahmet Baıtursynuly: til muraty, bolmys fılosofııasy». Bul da osy Alash taqyrybynan tamyr tartady. Onda Aqańnyń eńbegi oı-zerde, tanym, parasat turǵysynan taldanady.
Alash taqyrybyn arqaý etken taǵy bir týyndy – 2025 jyly shyqqan jazýshy Qaısar Álimniń «Atylýyn kútken alty kún» romany. Onda ólim jazasyna kesilgen alashordashy Seıdázim Qadyrbaı ómiriniń sońǵy sáti sýretteledi. Ol – Torǵaı óńirindegi Alashorda qozǵalysynyń qaıratkeri. Alashordashylar týraly derekterde, Mirjaqyp Dýlatulynyń qyzy Gúlnár Dýlatovanyń estelikterinde esimi jıi atalady.
Osyndaı Alash taqyrybyndaǵy kórkem jáne tanymdyq dúnıelerdiń kóbeıe berýine tilektespiz.