Syr eli — batyr babalarymyzdyń izi qalǵan qasıetti topyraq. Uly otan soǵysyna bir ǵana Qazaly aýdanynan 10 770 azamat maıdanǵa attanǵan.
Olardyń arasynda qazalylyq Áserbaevtar áýletiniń Baınıet, Aqnıet, Aınıet syndy úsh birdeı uly boldy. Soǵystan 6229 jaýynger ǵana aman-esen elge oralǵan. Ortanshy uly Baınıet Stalıngrad maıdanynda erlikpen qaza taýyp, Aqnıet jaraly bolyp qaıta elge oralǵan. Al kishi uly ákem Aınıet Áserbaev soǵys jyldarynda áskerge shaqyrylyp, Qıyr Shyǵystaǵy Japon ımperatorynyń Kvantýn armııasyna qarsy shyqqan shekara shebindegi qan maıdannyń ortasynan biraq shyqty.
Germanııa tize búkkenimen, ekinshi dúnıejúzilik soǵys aıaqtalmaǵan edi. Keńes Odaǵy Japonııaǵa qarsy soǵys jarııalap, Zabaıkal maıdanyna ásker qosty. Soǵysqa qatysqan 39-shy armııa quramynda Syr eliniń jaýyngeri Aınıette bolyp, 8-shi gvardııalyq dıvızııa quramynda jaýǵa toıtarys berdi. Keńes áskeriniń qatarynda Optor, Haılar, Harbın, Jalaınor baǵyttaryndaǵy soǵysta erligimen birneshe ret kózge túsken. 1948 jyly naýryz aıynda elge aman-esen jeńispen oraldy.
Soǵystan keıingi jyldary ákem Aınıet Áserbaev partııa, keńes qyzmetterinde jáne keıingi qyryq jyl ǵumyryn saýda salasyna arnady. Ol sol tusta quramynda irgeli astam qoımasy bar Birlik, Aqózek sekildi selo basshysy qyzmetin abyroımen atqaryp júrip, bilimin jetildirdi. Keıin Jańa Qazaly poselkesinde sharýashylyq azyq-túlik saýda mekemesin basqardy. Osylaı ómiriniń 40 jylyn basshylyq qyzmetke arnady. Zeınetke shyqqanǵa deıingi ómirindegi tynymsyz eńbegi eleýsiz qalǵan joq. Ol kózi tirisinde «Qurmet belgisi», «Eren erligi úshin», «Jýkov» atyndaǵy, taǵy kóptegen orden-medaldarmen marapattalǵan.
1925 jyly Qazaly aýdanynda dúnıege kelgen Aınıet Áserbaev 2000 jyly 75 jasynda kúz bosaǵasyn qaqqan shaǵynda dúnıeden ótti. Kózi tirisinde ulyn uıaǵa, qyzyn qııaǵa qondyrdy. Búginde batyrdyń ul -qyzdarynan urpaq jalǵasyn taýyp jatyr. «Erlerdi el de umytpas, jer de umytpas», dep áıgili Maǵjan aqyn jyrlaǵandaı, erlik eshqashan umytylmaıdy. 2022 jyly Qazaly aýdany, Áıteke bı kentinde Aınıet Áserbaev atyna kóshe berildi. Kózi tirisinde balalaryna «Adal bolsań abyroılysyń» dep ósıet qaldyrǵan.
Ulttyq kodymyzdy saqtap, óskeleń urpaqtyń boıyna batyr babalarymyzdyń erlik rýhyn sińirý maqsatynda batyrdyń balalary atalarynyń erligin, eńbekqorlyǵyn úlgi etip, 2018 jyly kelini Qarlyǵash Abdrahmanova «Adal bolsań, abyroılysyń” atty estelik kitap shyǵardy.
Jazylar estelikter men týraly,
Bireýler jan edi der ór tulǵaly.
Bireýler tulpar edi der de múmkin,
Bútindelmeı ketken bir er-turmany, -
dep aqıyq aqyn Muqaǵalı Maqataev jyrlaǵandaı, Jeńistiń 80 jyldyǵy mereıtoıynda batyrdyń urpaqtary estelik jazyp, sarǵaıǵan sýretterge qarap, atalaryna saǵyna eske alady.
Aserbaev Bolatbek