Qazaqstanda jetim jáne ata-anasynyń qamqorlyǵynsyz qalǵan balalardy qoldaý júıesi kúsheıtilip jatyr. Qazirgi tańda óńirlerde 330-dan asa tálimger jumys isteıdi. Bul týraly Oqý-aǵartý mınıstri Ǵanı Beısembaevtyń jetim jáne ata-anasynyń qamqorlyǵynsyz qalǵan balalarǵa arnalǵan uıymdardyń basshylarymen kezdesý kezinde aıtyldy, dep habarlaıdy Egemen.kz.
Mınıstrliktiń málimdeýinshe, jıynda balalardyń quqyqtaryn qorǵaýdyń jańa tásilderi, otbasylyq qundylyqtardy damytý, áleýmettik jetimdiktiń aldyn alý jáne balany ornalastyrýdyń balamaly túrlerin keńeıtý máseleleri talqylandy. Jyl qorytyndysy boıynsha engizilgen mańyzdy jańalyqtardyń biri balany tárbıeleýdiń jańa túri retinde kásibı qabyldaýshy otbasylar ınstıtýtynyń iske qosylýy boldy. Bul ádis balalardyń qolaıly ári qaýipsiz ortada ósýine múmkindik berip, olardyń eń osal kezeńinde turaqtylyq pen qamqorlyqty qamtamasyz etýge baǵyttalǵan.
Kezdesýde sóz alǵan mınıstr Ǵ.Beısembaev: «Kásibı qabyldaýshy otbasy – bul erte kezeńde qoldaý kórsetýdiń mańyzdy tetigi. Mundaı otbasy qıyn jaǵdaıda qalǵan balanyń alǵashqy kúnderden-aq otbasy jylýyn sezinip, turaqty qoldaý alýyna múmkindik beredi. О́ńirler bul baǵytta belsendilik tanytyp, kásibı jaýapkershilikpen jumys isteýi qajet. О́ıtkeni balanyń ózin qaýipsiz sezinýi jergilikti jerlerdegi qoldaýshy ortaǵa baılanysty. Biz ár basshynyń, ár mamannyń bastamashyldyǵy men jaýapkershiligine senim artamyz», dedi.
Zań sheńberinde alǵash ret qamqorshylyq organdary qyzmetkerleriniń sanyna qatysty naqty normatıv bekitildi – árbir 5 myń balaǵa bir mamannan. Qazirdiń ózinde óńirlerde 900 qosymsha shtat birligi qurylǵan. Bul otbasylardy qoldaý men aldyn alý jumystaryn tıimdi júrgizýge jol ashady. Sonymen qatar, tálimgerlik ınstıtýty da belsendi damyp keledi. Búginde 330-dan astam tálimger ata-anasynyń qamqorlyǵynsyz qalǵan balalarmen jumys júrgizip, olardyń áleýmettik beıimdelýine kómektesip jatyr.
Búginde elimizde 110-nan asa balalardy qoldaý ortalyǵy, balalar aýyldary, medısınalyq-áleýmettik jáne arnaıy mekemeler jumys isteıdi.