Qytaıdyń Haınan aralynda álemge tanymal «Namys doda» (Bolshıe gonkı) sporttyq-tanymdyq teleshoýynyń túsirilimderi ótti. Atalǵan synǵa otandyq sport jáne óner juldyzdarynan jasaqtalǵan Qazaqstan komandasy da qatysýda. Bul týraly «Qazaqstan» teleradıo korporasııasynyń baspasóz qyzmeti habarlady.
Bıyl oıynǵa Qazaqstannan bólek, Qytaı, Vengrııa, Fransııa jáne Aljır eliniń komandalary da baq synaýda. Buǵan deıin Qazaqstan osy shoýǵa úsh ret qatysty. Naqty aıtsaq, 2007 jyly – 4-oryn, 2008 jyly – 2-oryn, al 2012 jyly 1-oryndy ıelengen edi.
Árbir qatysýshy elden onyń tanymal tulǵalary: sport túrleri boıynsha álem chempıondary, estrada juldyzdary qatysady. Qazaqstan quramanyń bas jattyqtyrýshysy – erejesiz jekpe-jek boıynsha úsh dúrkin álem chempıony, Eýropa jáne Azııa chempıony, erejesiz jekpe-jek boıynsha álem kýbogynyń ıgeri Ardaq Nazarov. Odan bólek, Qazaqstannyń birqatar óner juldyzdary komandamyzdy qoldaý úshin Qytaı eline attandy.
Bıyl «Bolshıe gonkı» jobasynyń erejeleri ózgerdi. Endi qatysýshylar oıynnyń ár jarysynda jeńis úshin ter tógetin bolady. Budan buryn «Chempıon qabyrǵasy» oıyny upaılardy esepteý kezinde mańyzdy jáne sheshýshi bolatyn. Búgingi kúni upaı sanyn sanaý jáne altyn, kúmis jáne qola medaldar ár oıyn aıaqtalǵan saıyn tabystalyp, eń sońynda oıynnyń barlyq kezeńderi boıynsha jalpy upaı esepteledi.
Shoýdyń televızııalyq nusqasy «Qazaqstan» telearnasynan aldaǵy kúzde «Namys doda» ataýymen kórsetiledi. Bul shoý alǵash ret 1962 jyly Fransııada Intervilles (qalaaralyq) degen ataýmen paıda boldy. Keıin álemniń 30-dan astam elinde tanymal bolyp, kóptegen memleketter qatysatyn sporttyq-tanymdyq teleshoýǵa aınaldy. Oıyndardyń negizin sol jyldary Fransııanyń prezıdenti Sharl de Goll qalady. Onyń maqsaty – halyqtar dostyǵyn nyǵaıtyp, Eýropa jastarynyń kóńilin kóterý.
Jobanyń aýdıtorııasy 2 mlrd. adamdy quraıdy. Mundaı aýdıtorııa tek Olımpıada oıyndarynda jınalady. Bul televızııa damýyndaǵy álemdik barlyq tendensııalarǵa sáıkes keletin otandyq televızııadaǵy iri kólemdegi jáne joǵary sapadaǵy birden-bir shoý.
Elaman Qońyr.
Derek, sýret: «Qazaqstan» teleradıo korporasııasynyń baspasóz qyzmeti.