22 mamyr men 1 maýsym aralyǵynda Qazaqstanda alǵash ret Halyqaralyq balalardy qorǵaý kúnine arnalǵan «Qazaqstan balalary» ulttyq naýqany ótýde.
Memleket basshysy Qasym-Jomart Toqaev Ulttyq quryltaıdyń IV otyrysynda atap ótkendeı, balalarǵa qamqorlyq kórsetý – bul ortaq jaýapkershilik ári memlekettik saıasattyń basty basymdyǵy. Osyǵan oraı bul bastama – balalar máselesine erekshe kóńil bólýge jáne balalardyń qaýipsiz ortada ósip-jetilýine jaǵdaı jasaýǵa, sondaı-aq qoǵamnyń nazaryn bala quqyǵy men balalyq shaqtaǵy ózekti máselelerge aýdarýǵa baǵyttalǵan.
Merekege deıingi is-sharalar legi QR Mádenıet jáne aqparat mınıstrligi «Ákem — tiregim, anam – júregim» uranymen uıymdastyrǵan naýqannan bastaldy. Bul is-sharanyń taqyryby bala ómirindegi otbasynyń rólin aıqyndaý boldy.
Elimizdiń barlyq óńirinde balalarǵa arnalǵan mádenı-tanymdyq is-sharalar uıymdastyryldy. Atap aıtsaq, teatrlyq jáne konserttik baǵdarlamalar, sporttyq jáne shyǵarmashylyq baıqaýlar, mýzeıler men kitaphanalardaǵy taqyryptyq kórmeler ótti.
Sondaı-aq naýqan aıasynda barlyq aımaqta Otbasyny qoldaý ortalyqtarynda ashyq esik kúnderi ótti. Onda qazaqstandyqtar túrli sala mamandarynan keńes alyp, ata-ananyń jaýapkershiligin túsinýge arnalǵan oqytý is-sharalaryna qatysty.
«Qazaqstan balalary» ulttyq naýqanyna alǵashqy kúni elimiz boıynsha jarty mıllıonnan astam qazaqstandyq qatysty.