Jambyl oblysynda onkologııalyq aýrýlardy anyqtaýǵa arnalǵan ekspress-gıstologııa iske qosyldy, dep habarlaıdy Egemen.kz.
Oblystyq densaýlyq saqtaý basqarmasynyń baspasóz qyzmeti taratqan málimetke sensek, kópbeıindi onkologııa jáne hırýrgııa ortalyǵy aty jaman aýrýmen kúrestiń jańa satysyna kóship otyr.
Ortalyqta jylyna 800-den astam ota jasalady. Buryn pasıentke medısınalyq saraptaý qorytyndysyn qoıý úshin onyń gıstologııalyq taldaýy Almaty jáne Astana qalalaryna jiberilip, qorytyndysyn kútý úshin 2-3 apta ýaqyt ketetin. Gıstologııalyq zertteý nátıjesi kelmeıinshe, naýqasqa em taǵaıyndaý da múmkin emes edi. Endi sol olqylyqtyń orny toltyryldy.Mamandardyń aıtýynsha, ekspress-gıstologııa – ota kezinde alynǵan tin úlgisin jedel túrde muzdatyp, mıkroskoppen zertteýge múmkindik beretin zamanaýı ádis. Ol nebári 15-20 mınýt ishinde nátıjeni anyqtap, operasııa barysyna dereý ózgeris engizýge jaǵdaı jasaıdy. Mundaı tehnologııa hırýrgııanyń dáldigin arttyryp qana qoımaı, emniń tıimdi strategııasyn tańdaýǵa múmkindik beredi.
Ortalyq mamandarynyń ádisti meńgerý boıynsha biliktilikteri jetildirilip, tájirıbe almasýlardan ótti. Aldaǵy ýaqytta onkologııalyq aýrýlardy 15-20 mınýtta anyqtaıtyn ádistiń arqasynda bul dertti emdeýge tıimdilik te joǵarylamaq.
Jambyl oblysy