ASTANA. 21 maýsym. Keshe Almatydaǵy Balýan Sholaq saraıynda mánerlep syrǵanaýdyń has sheberi, Sochı Olımpıadasynyń qola júldegeri, otandasymyz Denıs Tenniń «Sálem, Almaty» atty muz aıdyndaǵy shoýynyń birinshi kúni ótti. Oǵan sportshynyń ózinen bólek, dostary, mánerlep syrǵanaýdan Olımpıada jáne álem chempıondary jáne basqa da belgili atalǵan sport juldyzdary qatysty. Sondaı-aq, shoýdy tamashalaýǵa Japonııa, Ońtústik Koreıa jáne Qytaı elderinen de jankúıerler keldi. Bul týraly egemen.kz habarlady.
Denıs Ten otandyq jankúıerlerine osymen úshinshi jyl qatarynan tamasha shoý usynyp keledi. Bul joly uıymdastyrýshylar tehnıkalyq bezendirýge erekshe mán bergeni baıqalady. Ol úshin eki qabatty sahnany aıtsaq jetkilikti.
Aldymen barlyq qatysýshy bir mezette aıdynǵa shyǵyp óner kórsetti. Keıin jankúıerler Ońtústik Koreıa ókili áıgili Sý Iýn Pak pen kanadalyq Eladj Baldeniń tamasha ónerine kýá boldy.
Jalpy, shoýdyń birinshi kúninde AQSh-tan arnaıy kelgen juptasyp bıleýdiń sheberleri Aleks pen Maııa Shıbýtanı, juptasyp óner kórsetýden eki dúrkin álem chempıondary Sın Pan men Szıan Týn, bıylǵy álem chempıonatynyń qola júldegeri, reseılik Elena Rodıonova, Olımpıada chempıondary Tatıana Volosojar men Maksım Trankov jáne taǵy basqa belgili mánerlep syrǵanaýshylar aıdynǵa shyqty.
Sonymen qatar, shoýdyń taǵy bir ereksheligi, sportshylar jandy mýzykanyń súıemeldeýimen óner kórsetti. Denıs Ten «Turan» etno-folklorlyq tobynyń oryndaýyndaǵy akkompanementke bıledi. Al kesh sońynda jyldaǵy dástúr boıynsha barlyq qatysýshy qazaqtyń ulttyq kıimin kıip aıdynǵa shyqty.
Shoýdyń jalǵasy búgin bolatynyn aıta keteıik.
Elaman Qońyr.
Derek: egemen.kz.
Sýret: vesti.kz.