Batys Qazaqstan oblysynda barlyq mektep «Bilimim – Otanyma!» atty respýblıkalyq synyp saǵatyn ótkizdi. Bul – ásirese 11 synypty támamdap, úlken ómirge qadam basatyn 7095 túlek úshin sezimge toly áserli sát.
«Aqjaıyq óńirinde barlyǵy 379 mektep bar, onda 124 myńnan astam oqýshy bilim alyp júr. Mektep bitiretin 7 myńnan asa túlek úshin «Mektebim, saǵan myń alǵys!» atty saltanatty is-shara ótti. Bıyl bizdiń 337 oqýshymyz «Altyn belgige» úmitker, al 419-y «Úzdik attestatqa» úmitker bolyp otyr», deıdi Batys Qazaqstan oblystyq bilim basqarmasynyń basshysy Eldos Safýllın.
2024–2025 oqý jyly óte jaqsy nátıjemen aıaqtaldy dep aıtýǵa bolady. Respýblıkalyq, halyqaralyq olımpıadalar men konkýrstarda 78 oqýshy 14 altyn, 24 kúmis, 43 qola medaldyń ıegeri atanǵan. Munyń ishinde dárejesi óte joǵary halyqaralyq O.Jáýtikov atyndaǵy olımpıadasy, О́.Joldasbekov atyndaǵy matematıka jáne mehanıka boıynsha halyqaralyq zertteý jobalary konkýrsy, respýblıkalyq olımpıadalar men ǵylymı jobalar konkýrstary bar.
Ásirese aýyl mektepteriniń jetistigi kóńilge qýanysh uıalatady. Aýyl mektebi oqýshylaryna arnalǵan respýblıkalyq olımpıadada Tasqala aýdanynyń «Sáýlet» mektep-lıseıi «Eń úzdik aýyl mektebi – 2024» ataǵyn alsa, jalpy bilim beretin pánder boıynsha respýblıkalyq olımpıadada Batys Qazaqstan oblysynyń komandasy «Eń úzdik olımpıadalyq komanda – 2025» ıelenip, II dárejeli dıplommen marapattaldy. Jalpy, oblys komandasynyń qorjynynda 6 altyn, 3 kúmis, 7 qola medal bar. Qoǵamdyq-gýmanıtarlyq baǵyt boıynsha Qaztalov aýdany K.Meńdalıev atyndaǵy jalpy orta bilim beretin mekteptiń 11-synyp oqýshysy Saıda Ábýhanova «Úzdik aýyl mektebiniń oqýshysy» boldy.
«Memleket basshysynyń tapsyrmasyna sáıkes mektepterdi renovasııalaý baǵdarlamasy bastaldy. Bıyl 6 mektepke jańǵyrtý jumysy júrgiziledi. Olar – Aqjaıyq aýdanyndaǵy Ǵ.Mahambetov atyndaǵy orta mektep, Qaztalov aýdanyndaǵy Qaraózen mektep-lıseıi, Báıterek aýdanyndaǵy Beles mektep-bóbekjaı-balabaqsha kesheni, Shyńǵyrlaý aýdanyndaǵy L.Qylyshev atyndaǵy orta mektep, Jańaqala aýdanyndaǵy D.Nurpeıisova atyndaǵy mektep, Syrym aýdanyndaǵy A.Jumaǵalıev atyndaǵy mektep-balabaqsha kesheni», deıdi Eldos Nábıollauly.
Budan bólek, oblys aýmaǵynda «Keleshek mektepter» ulttyq jobasy aıasynda úsh mektep salyndy. Onyń ekeýi Oral qalasynda – Derkól kentinde 1500 oryndyq №51 mektep, Balaýsa shaǵyn aýdanynda 1500 oryndyq №53 mektep. Sondaı-aq Terekti aýdanynyń Podstepnoe aýylynda 1200 oryndyq mektep te paıdalanýǵa berildi. Dál qazir taǵy osyndaı 6 mektep qurylysy júrip jatyr.
Sońǵy oqý jylynyń ózinde oblysta 4768 oqýshy oqıtyn jańa mektep salynyp, shákirt tárbıeleýge kirisken. Jyl saıyn aýyl mektebin jańǵyrtý, qoldanystaǵy mektepterdi kúrdeli jóńdeý jáne zamanaýı pándik kabınettermen jabdyqtaý jumysy da júıeli júrip jatyr. Osy jyldyń ózinde robottehnıka, hımııa, bıologııa, fızıka jáne STEM-pánder boıynsha 193 zamanaýı pándik kabınet jabdyqtalǵan.
«Memleket basshysynyń 2024 jylǵy Joldaýynda berilgen tapsyrmasyn oryndaý maqsatynda 2025–2027 jyldar aralyǵynda Batys Qazaqstan bilim basqarmasyna qarasty 86 mektep, onyń ishinde 2025 jyly – 5 mektep, 2026 jyly – 34 mektep, 2027 jyly 47 mektep kúrdeli jóndeýden ótedi. Jalpy, 86 mekteptiń kúrdeli jóndeý jumysyna 60 521,8 mln teńge qarajat jumsalady», deıdi basqarma basshysy.
Batys Qazaqstan oblysy