Qostanaı oblysynda oqýshylardyń mekteppen qoshtasý jıyndary bastaldy. Bıyl óńirde 4 700-den astam oqýshy 11-shi synypty támamdaıdy. 228 oqýshy «Altyn belgige», 290 túlek úzdik attestatqa úmitker.
Búgin Qostanaı qalasyndaǵy № 32 jaıly mekteptiń 11-shi synyp oqýshylary altyn uıa mektebimen qoshtasty. Saltanatty is-sharaǵa ata-analar, sala basshylary, máslıhat depýtattary qatysyp, ómirdiń jańa bir belesine aıaq basqaly turǵan túlekterge aqyl-keńesterin aıtyp, sát-sapar tiledi.
«Sizder Memleket basshysy Qasym-Jomart Kemeluly Toqaevtyń tikeleı tapsyrmasy boıynsha salynǵan zamanaýı mektepte bilim aldyńyzdar. Búgin oqýlaryńyzdy támamdap, mekteppen qoshtasyp, ómirdiń jarqyn da, qyzyq jańa kezeńine qadam basqaly tursyzdar. Aldaryńyzda talaı asýlar kútip tur. Maqsatqa jetý jolynda qıyndyqtan taısalmańyzdar. Boılaryńyzdaǵy kúsh-qaıratty, bilimdi ıgi maqsatqa jumsańyzdar, alǵa umtylyńyzdar. Sizder – osy eldiń bolashaǵysyzdar», dedi oblystyq máslıhat tóraǵasy Saılaýbek Esjanov.
On bir jyl boıy bilim nárimen sýsyndatyp, laıyqty tálim-tárbıe bergen altyn uıa mektebimen qımaı-qımaı qoshtasqan túlekter de ustazdaryna alǵys aıtyp, izgi tilek arnady.
«Mektep bizge sapaly bilim, sanaly tárbıe berdi. Biz munda kúrdeli teńdeýlerdi sheshýdi úırenip qana qoımaı, sonymen qatar meıirimdi, adal azamat bolýdy úırendik. Mektebimizdi, aıaýly ustazdarymyzdy qımaımyz, árıne. Búgin ol kisilerge basymyzdy ıip turyp rahmet aıtamyz. Aldaǵy ýaqytta bizge artqan senimderin aqtap, elimizdiń jaqsy azamaty bolýǵa umtylamyz», deıdi mektep túlegi Bekzat Álhamhaıyr.
Saltanatty is-sharanyń sońynda túlekter dástúrli mektep valsin bıledi.
Qostanaı oblysy