Senat depýtattary Súıindik Aldashev, Bıbıgúl Jeksenbaı, Aınur Arǵynbekova jáne Zakırjan Kýzıev Koreıa Respýblıkasynyń Ulttyq Assambleıasy janyndaǵy Balalar, halyq jáne qorshaǵan orta máseleleri jónindegi komıtet tóraǵasy Lı In Ionmen kezdesti. Áńgimelesý barysynda taraptar zań shyǵarý organdary arasyndaǵy yntymaqtastyqty odan ári damytý keleshegin talqylady.
Súıindik Aldashev atap ótkendeı, Qazaqstan men Koreıa arasyndaǵy saıası baılanystar syndarly dıalog pen tyǵyz qarym-qatynasqa negizdelgen. Ekijaqty qatynastar ózara senim men ashyqtyq rýhynda joǵary deńgeıde belsendi damyp keledi. Senator keıingi jyldary bul seriktestiktiń aıasyn keńeıtýge eki el basshylarynyń ózara saparlary da serpin bergenin aıtty.
Osy rette Koreıa Ulttyq Assambleıasy qurǵan qorshaǵan orta jáne damý máseleleri jónindegi Azııa-Tynyq muhıty parlamenttik forýmynyń kún tártibi men onyń Qazaqstan maqsattarymen úndestigi erekshe atalyp ótti. Taraptar birlesken kúsh-jigerdi bala men otbasy quqyqtaryn qorǵaýǵa, gýmanıtarlyq baǵyttaǵy bastamalardy ilgeriletýge jumsaýǵa nıetti ekenin bildirdi. Sondaı-aq koreıalyq parlamentshilerge kámeletke tolmaǵandarǵa qatysty quqyq buzýshylyqtardyń aldyn alý jáne oǵan qarsy kúres baǵytynda Qazaqstanda qolǵa alynǵan zańnamalyq sharalar tanystyryldy.
«Qazaqstan balalar men otbasy densaýlyǵyn qorǵaýǵa basymdyq beredi. 2022 jyl Balalar jyly dep jarııalanyp, áleýmettik qorǵaý, bilim berý jáne densaýlyq saqtaý salalarynda mańyzdy reformalar bastaldy. 2016 jyldan beri Bala quqyqtary jónindegi ýákil ınstıtýty jumys isteıdi. Bizdiń el Koreıada turatyn azamattardyń, onyń ishinde balalardyń quqyqtaryn qorǵaýǵa múddeli. Qazirgi ýaqytta Koreıada shamamen 45 myńdaı otandasymyz turady. Biz olardy sapaly bilimmen, medısınalyq jáne áleýmettik qyzmettermen qamtamasyz etýge umtylamyz. Osyǵan baılanysty Qazaqstan azamattarynyń balalaryna ınklıýzıvti bilim berý, erte damytý jáne mádenı ıntegrasııa baǵdarlamalaryna qoljetimdilikti qamtamasyz etýge kómektesý týraly koreıalyq tarapqa ótinish bildiremiz», dedi S.Aldashev.
Kezdesý barysynda taraptar saýda-ekonomıkalyq, ınvestısııalyq yntymaqtastyqty keńeıtý, sondaı-aq bilim berý, mádenıet, týrızm jáne ózge de salalardaǵy birlesken jobalardy iske asyrý máselelerin talqylady.
О́z kezeginde Lı In Ion kópjaqty qarym-qatynastardy damytýǵa qyzyǵýshylyq bildirip, Qazaqstanda júrgizilip jatqan reformalardyń tıimdiligin atap ótti.