О́ńirlerde júrgen senatorlar jastar máselesin de tasada qaldyrmady. Olardyń muń-muqtajyn tyńdap, arnaıy kezdesý ótkizdi.
Senator Darhan Qydyráli Jambyl oblysynda mádenıet salasynyń ókilderimen, shyǵarmashyl jastarmen kezdesti. Depýtat jastarǵa motıvasııa ǵana emes, ózin-ózi tanytýǵa naqty múmkindik qajet ekenin atap ótti. Onyń aıtýynsha, kreatıvti ındýstrııany, mádenıet pen bilim berýdi damytý jas otandastarymyzdyń áleýetin ashýǵa negiz bolýǵa tıis.
«Jastar – órshil ómirdiń basty qozǵaýshysy. Olardyń ıdeıalaryn, shyǵarmashylyq bastamalary men jobalaryn qoldaý mádenıetke qosqan úles qana emes, bul – elimizdiń bolashaǵyna salynǵan ınvestısııa. Biz birde-bir daryndy jasty nazardan tys qalmaýyna jaǵdaı jasaýymyz kerek», dedi D.Qydyráli.
Al Senat depýtattary Arman О́teǵulov pen Lázzat Rysbekova Batys Qazaqstan oblysyndaǵy aýyl sharýashylyǵy kásiporyndarynyń jumysymen tanysty. Olar Podstepnovka aýyldyq okrýgindegi Barbastaý aýylynda ashyq sý aıdyndarynda forel men tuqy balyǵyn ósiretin «Barbastau river» kooperatıvinde boldy. Mekeme «Aýyl amanaty» baǵdarlamasy aıasynda balyq ósiredi. Depýtattar balyq sharýashylyǵyn damytý men osy saladaǵy memlekettik qoldaýdyń tetikterin kásiporyn basshylyǵymen birge talqylady.
Sondaı-aq senatorlar ósimdik sharýashylyǵyna mamandanǵan «Jaına» jáne «WestAgroFood» seriktestiginde de boldy. Onda sýbsıdııalaý, sýmen qamtamasyz etý jáne agrotehnologııany engizý máseleleri týraly áńgime qozǵaldy.
«Aýyl sharýashylyǵy memlekettik saıasattyń negizgi basymdyqtarynyń biri bolyp qala beredi. Búgingi tańda fermerlerdi qoldaýmen qatar klımattyń ózgerýinen bastap azyq-túlik qaýipsizdigine deıingi ýaqyttyń qaterine jaýap bere alatyn turaqty júıe quryp otyrmyz», dedi A.О́teǵulov.
Senat depýtaty, Parlamenttegi «Bir el – bir múdde» depýtattyq tobynyń jetekshisi Nurtóre Júsip Almatydaǵy Qazaqstan halqy Assambleıasynyń aktıvimen, etnomádenı birlestikterdiń ókilderimen jáne qalalyq máslıhat depýtattarymen kezdesti. Ol ulttyq birlik jaı ǵana uran emes, memleket damýynyń strategııalyq shart ekenin túsiný kerek ekenin aıtty. О́ıtkeni qazir álemde geosaıası turaqsyzdyq, daralyq daǵdarysy, kóshi-qon aǵyny jáne radıkaldy kóńil kúı kúsheıe tústi, sondyqtan ishki yntymaq pen ózara syılastyqty saqtaý asa mańyzdy.
«QHA – tek konsýltatıvtik organ emes, ol ar-namys pen ıdeologııanyń ózegi, ulttyq kelisimniń nyshany, turaqtylyqtyń strategııalyq resýrsy jáne bolashaqtyń kepili. Ony qoldap, damytý arqyly biz etnosaralyq álemdi nyǵaıta túsemiz, qazirgi zamandaǵy egemen, myqty jáne ádiletti Qazaqstannyń irgetasyn qalap otyrmyz», dedi depýtat.
Senat depýtattary Álı Bektaev, Murat Qadyrbek, Alısher Satvaldıev Túrkistan oblysynyń Tólebı aýdanynda bolyp, óńirdegi kezdesýlerdi jalǵastyrdy. Sapar barysynda ónerkásip, agrarlyq jáne ınfraqurylymdyq damý, sondaı-aq sýmen jabdyqtaý jáne jumyspen qamtý máseleleri basty nazarda boldy.
«Biz óńirge kezdesý úshin ǵana emes, sol jerdegi ózekti máselemen tanysyp, olardy sheshý joldaryn birlesip izdeý úshin kelemiz. Tólebı aýdanynyń 25 myń turǵynyn aýyzsýmen qamtamasyz etý máselesi jyldar boıy kún tártibinde turǵan edi. Salalyq mınıstrlikpen ózara is-qımyl jáne memorandýmnyń arqasynda naqty jumys jasaldy», dedi Á.Bektaev.
Senat depýtattary Olga Perepechına men Ásem Rahmetovanyń da Soltústik Qazaqstan oblysyndaǵy sapary jalǵasyp jatyr. Olar M.Jumabaev atyndaǵy aýdanda bolyp, turǵyndarmen kezdesti.
Senatorlar Býlaev qalasynda jol qurylysy jumysynyń barysymen de tanysty. Depýtattar negizgi ýchaskelerdi kórip, merdigerlermen jolyqty. Sondaı-aq olar kúrdeli jóndeý júrip jatqan perzenthana men balabaqshada, jergilikti orta mektepte boldy.
Senatorlar Býlaev qalasyndaǵy mádenıet úıinde azamattardy jeke qabyldady. Turǵyndar aýyldardy gazdandyrý jáne sýmen qamtamasyz etý, jedel járdem kóligi, kentishilik joldardyń jaı-kúıi, sondaı-aq hokkeı kortynyń ústine shatyr turǵyzý qajettigi týraly máselelerdi aıtty. Barlyq ótinish depýtattar baqylaýyna alynyp, olardy sheshýge tıisti tapsyrmalar berildi.