Qazir – grant konkýrsyna qujat qabyldaý ýaqyty aıaqtalyp, úmitkerler taqymyn qysyp júrgen shaq. Kóp kúttirgen tizim 10 tamyzǵa deıin shyǵyp qalýǵa tıis. Sol tegin oqýǵa joldama ala almaǵan jaǵdaıda keıbir talapkerlerge taǵy bir múmkindik týyp tur.
Ǵylym jáne joǵary bilim mınıstrligi jaqynda «Qazaqstan halqyna» qoǵamdyq qorynyń jańa oqý jylyna 500 grant bólgenin habarlady. Bul kimderge berilmek?
Talapkerlerge joǵary oqý oryndarynda oqýǵa jaǵdaı jasaıtyn qaıyrymdylyq baǵdarlamasynyń sharty negizinde bilim grantyna mynadaı sanattaǵy talapkerler úmitker bola alady:
1) aýyldyq jerlerdegi, shaǵyn jáne monoqalalardaǵy az qamtylǵan otbasylardan shyqqan balalar;
2) jetim balalar nemese kámeletke tolǵanǵa deıin ata-anasynyń qamqorlyǵynsyz qalǵandar;
3) múgedektigi bar azamattar;
4) múgedek balalardy tárbıelep otyrǵan otbasylardan shyqqan balalar;
5) 2022 jylǵy qaıǵyly qańtar oqıǵalary kezinde qaza tapqan Qazaqstan Respýblıkasy azamattarynyń balalary;
6) 2022 jylǵy qaıǵyly qańtar oqıǵalary kezinde jaraqat alǵan balalar.
Osy jerde baǵdarlamaǵa qatysýdyń shekti jasy tolyq 29 jasty quraıtynyn eskerte ketken jón.
Bilim granty bir rettik tártippen ataýly grant negizinde usynylady. Bul grant joǵary bilimi bar tulǵalarǵa, sondaı-aq respýblıkalyq nemese jergilikti bıýdjet qarajaty esebinen «bakalavr» dárejesin alý úshin memlekettik bilim granty taǵaıyndalǵan tulǵalarǵa ekinshi joǵary bilim alýǵa jáne onlaın-oqýǵa berilmeıdi.
Grant taǵaıyndalatyn úmitkerlerdiń tizimin Joǵary jáne joǵary oqý ornynan keıingi bilim berý uıymy ıakı fılıaly bıyl UBT-dan ótken jáne onyń nátıjeleri boıynsha oqýǵa túsý úshin qajetti shekti balyn jınaǵan (onyń ishinde shyǵarmashylyq emtıhandardy eskere otyryp) talapkerler qatarynan jasaqtaıdy. Tizim joǵary oqý ornynyń nemese fılıaldyń konkýrstyq komıssııasy otyrysynyń hattamasy túrinde rásimdeledi.