Senatorlardyń óńirlerdegi sapary jalǵasyp jatyr. Senat depýtattary Olga Býlavkına men Shákárim Buqtuǵutov Shyǵys Qazaqstan oblysyna jasaǵan jumys sapary aıasynda Rıdder qalasyna bardy. Al Sultanbek Mákejanov Almaty qalasynda densaýlyq saqtaý júıesin jańǵyrtý barysymen, al Saǵyndyq Luqpanov Atyraý oblysyndaǵy temirjol salasyn damytý máselelerimen tanysty.
Issapar barysynda olar eńbek ujymdarymen kezdesip, qurylys kezeńindegi ınfraqurylymdyq jáne áleýmettik jobalardyń júzege asyrylý barysymen tanysty.
Rıdder orman sharýashylyǵynda senatorlar jumysshylarmen jańadan kúshine engen «Erekshe qorǵalatyn tabıǵı aýmaqtar týraly» zańnyń negizgi erejelerin, sondaı-aq orman qory jerlerin basqarý máselelerin talqylady. Sala qyzmetkerlerine kórsetiletin áleýmettik qoldaý sharalaryna erekshe nazar aýdaryldy.
Kezdesý kezinde ekologııalyq mádenıetti qalyptastyrý, qorshaǵan ortaǵa jaýapkershilikpen qaraý máseleleri kóterildi. Senatorlar qoǵamdyq oryndardaǵy tazalyq pen tártip tek kommýnaldyq qyzmetterdiń jumysyna ǵana emes, eń aldymen, ár azamattyń jeke jaýapkershiligine baılanysty ekenin atap ótti.
«Tazalyq – tek tehnıka men baqylaý máselesi ǵana emes, qoǵamnyń mádenıeti, tárbıesi men sanasynyń kórinisi. Búginde tabıǵatqa uqypty kózqarasty kishkentaı kezden bastap qalyptastyrý asa mańyzdy. Bizge tek erejeler ǵana emes, ishki jaýapkershilik te qajet. Memleket basshysynyń «Taza Qazaqstan» bastamasy – bul jaı ǵana uran emes, bul – eldiktiń belgisi», dedi Olga Býlavkına.
Senatorlar sondaı-aq «Montana» sport klýbyna baryp, jastar arasynda salamatty ómir saltyn qalyptastyrý men sportpen aınalysýǵa jaǵdaı jasaýdyń mańyzdylyǵyn atap ótti. Olardyń aıtýynsha, qoljetimdi sport ınfraqurylymyn damytý – áleýmettik saıasattyń basym baǵyttarynyń biri.
Sonymen qatar depýtattar jańadan salynyp jatqan «SteakKing» sýpermarketiniń qurylysymen tanysty. Senatorlardyń aıtýynsha, bul joba shaǵyn jáne orta bıznesti damytýǵa serpin berip, óńirdegi tutynýshylyq ınfraqurylymdy keńeıtýge úles qosady.
Depýtattar kópbeıindi aýrýhana kesheniniń qurylys alańyna bardy. Onda medısınalyq mekemeniń qarjylandyrylýy, jabdyqtalýy jáne qurylystyń aıaqtalý merzimi talqylandy.
Parlamentshiler bul nysannyń iske qosylýy Rıdder jáne jaqyn mańdaǵy eldi meken turǵyndary úshin medısınalyq qyzmetterdiń qoljetimdiligi men sapasyn edáýir arttyratynyn aıtty.
«Biz elimizdiń óńirlerinde, sonyń ishinde Rıdder qalasynda azamattarymyzdyń ómir súrý sapasyn arttyrýǵa baǵyttalǵan naqty jobalardyń iske asyp jatqanyn kórip otyrmyz. Mundaı saparlar halyqtyń pikirin tikeleı estip, sheshýdi qajet etetin máselelerdi naqtylap, zań shyǵarý jáne ókildik qyzmetimiz aıasynda naqty nátıjelerge qol jetkizýge múmkindik beredi», dedi Shákárim Buqtuǵutov.
Al depýtat Sultanbek Mákejanov Almaty qalalyq máslıhatynyń depýtattarymen birge birqatar densaýlyq saqtaý nysandaryn aralady. Atap aıtqanda, senator bıyl qurylysy bastalǵan jańa emhananyń qurylys alańynda boldy. Ol zamanaýı ári qoljetimdi medısınalyq mekemeler salý memlekettik saıasattyń basym baǵyttarynyń biri ekenin atap ótti.
«Mundaı jobalar belgilengen merzimde ári sapaly júzege asyrylýy kerek. О́ıtkeni bul tikeleı halyqqa kórsetiletin medısınalyq kómektiń sapasyna áser etedi», dedi S.Mákejanov.
Sondaı-aq senator aýqymdy qaıta jóndeý jumystary júrgizilgen №3 qalalyq emhanaǵa bardy. Munda ishki jaılar men ınjenerlik jeliler tolyq jańartylyp, sıfrlyq qyzmetter engizilgen, sondaı-aq zamanaýı medısınalyq qural-jabdyqtar ornatylǵan.
«Densaýlyq saqtaý ınfraqurylymyn damytý – ult saýlyǵyna salynatyn ınvestısııa. Parlament músheleri retinde bizdiń mindetimiz – mundaı jobalardyń sapaly júzege asýyn baqylap, medısınalyq qyzmetterdiń árbir azamatqa qoljetimdi bolýyna jaǵdaı jasaý», dep atap ótti depýtat.
Sapar barysynda S.Mákejanov renovasııa baǵdarlamasy aıasynda iske asyrylyp jatqan qurylys nysandarynda da boldy.
Senator Saǵyndyq Luqpanov «Qazaqstan temir joly» UK» aksıonerlik qoǵamynyń óńirdegi fılıaly ókilderimen kezdesti. Onda júk jáne jolaýshy tasymaldarynyń qazirgi jaǵdaıy men bolashaǵy, qozǵalys qaýipsizdigin qamtamasyz etý sharalary, sondaı-aq óńirdegi temirjol jelisin jańǵyrtý men ońtaılandyrý josparlary talqylandy.
«Zamanaýı ári qaýipsiz temirjol ınfraqurylymyn damytý – Atyraý oblysynyń turaqty ekonomıkalyq ósiminiń negizgi sharttarynyń biri. Senat júk tasymalyn tıimdi etýge jáne kólik qyzmetteriniń sapasyn arttyrýǵa baǵyttalǵan bastamalardy aldaǵy ýaqytta da qoldaıdy», dedi S.Luqpanov.
Senator, sondaı-aq, temirjol salasyn damytýdyń áleýmettik jáne ekonomıkalyq mańyzy zor ekenin atap ótti. Bul sala óńirdegi halyqty jumyspen qamtýǵa, ınvestısııa arttyrýǵa jáne turǵyndardyń ómir sapasyna tikeleı yqpal etedi.