Qostanaı oblysynda Prezıdent janyndaǵy Ulttyq ǵylym akademııasy Prezıdıýmynyń «Qýatty óńirlik ǵylym – qýatty óńir» taqyrybynda kóshpeli otyrysy ótti. Otandyq jáne sheteldik ǵalymdar, bıznes jáne joǵary oqý oryndarynyń ókilderi, memlekettik organdardyń basshylary saladaǵy máselelerdi talqylady. Jıynǵa Senat depýtaty Sergeı Karplıýk qatysty.
Qostanaı – aýyl sharýashylyǵy men mal sharýashylyǵy ónimderin óńdeýmen aınalysatyn óńirdiń biri. Tynys-tirshiligi osy salaǵa baǵyttalǵan. Endi qazir zaman talabyna saı ınnovasııalar men sıfrlyq tehnologııalardy engizip, ekologııalyq turaqtylyqty qamtamasyz etý qajet. Sondaı-aq maman daıarlap, ǵylymı áleýetti nyǵaıtý máselelerin jolǵa qoıý kerek.
«Qostanaı oblysy aıtarlyqtaı agrarlyq jáne ónerkásiptik resýrstarǵa ıe. Degenmen olardyń áleýetin tolyq ashý úshin ǵylymı ınfraqurylymdy jańǵyrtyp, jas zertteýshilerdi tartý qajet. Bul bilim ekonomıkasyn qalyptastyrýdyń jáne óńirdiń básekege qabilettiligin arttyrýdyń negizine aınalady», dedi senator S.Karplıýk.
Jıynda ǵylymı-ınnovasııalyq kórme, forsaıt-sessııa uıymdastyrylǵan, sondaı-aq Rýdnyı ındýstrııalyq ýnıversıteti bazasynda óńirlik forsaıt-ortalyǵy ashyldy. Salany ǵylymǵa baǵyttaý maqsatymen Ulttyq ǵylym akademııasy men Ǵylym qory yntymaqtastyq týraly memorandým jasasyp, aldaǵy ýaqytta birlesken jobalar men tájirıbe almasýdy josparlap otyr.
Sonymen qatar taldamalyq baıandama ázirlenip Úkimetke joldanbaq.