Kúni keshe Batys Altaıdyń baýraıynda bal merekesi toılandy. Aımaqta myń túrli gúlden san túrli bal jınaıtyn aranyń on myńnan astam uıasy bar. Onyń otyz paıyzǵa jýyǵy asyl tuqymdy ara desedi aýyl sharýashylyǵy mamandary. Búgingi omartashylardyń festıvaline elimizdiń ǵana emes, kórshiles Reseıdiń de baldan bulaq aǵyzǵan omartashylary keldi.
Shyǵysta dástúrli bal festıvali óńirde osymen jetinshi ret ótip otyr. Merekeniń bir ereksheligi, elimizdegi barlyq ult pen ulystyń dástúrin nasıhattap, dostyq qarym-qatynasty nyǵaıtý maqsatynda ótkiziledi. Sondyqtan da bolar, atalǵan is-sharaǵa qatysýshylar sany jyl sanap kóbeıip keledi. Bıyl mártebeli qonaqtar Reseıdiń sonaý Altaı ólkesinen de at arytyp kelgen. Úzdik bal kórmesine 16 omartashynyń ónimderi usynylǵan. Kórmege kelgenderdiń biri Anna Berdıýgına osy kásippen 20 jyldan beri úzdiksiz aınalysyp keledi. Kúıeýi omartashylar áýletiniń úshinshi urpaǵy. Kórmege shamamen 500 kg bal ákelgen.
«Baldyń dámi, onyń nári aranyń jaıylý alqabyna baılanysty. Bizde baldyń bes túri bar. Aıtar bolsaq, mamyrdaǵy túrli shóptiń tozańynan jınalǵan bal, dala jáne orman baly, qaraqumyq baly, ataqty Altaı baly. Al emge qoıý tústi baldy paıdalanǵan jón. О́ıtkeni olardyń dıastazy kóbirek, sapasy joǵary. Ásirese tumaý bolǵanda paıdalansa, taptyrmas em», deıdi Anna Berdıýgına.
Merekelik keshke kelgen kópshiliktiń kóńil kúıi kóterińki. Festıvalǵa qatysqan ónerpazdar án áýeletip, myń burala bı bıledi. Kórshiles el demekshi, Shyǵystyń baly ishki naryqpen ǵana shektelmeı, shetelge de shyǵyp jatyr. Byltyr 19,3 tonna bal eksporttaldy desek, ol aldyńǵy jylmen salystyrǵanda aıtarlyqtaı joǵary.
Batys Altaıda ara ósirip, bal saqtaǵan omartashylardyń ortaq merekesi osylaı toılanady. Oblystyq aýyl sharýashylyǵy basqarmasy mamandary da ara sharýashylyǵyn saqtaý úshin omartashylarǵa jan-jaqty qoldaý kórsetýdi jalǵastyratynyn aıtty.
Shyǵys Qazaqstan oblysy,
Rıdder qalasy