Elimizde 2025–2026 jyldarǵa arnalǵan epıdemıologııalyq maýsymǵa daıyndyq sharalary bastaldy. Osyǵan baılanysty elimizdiń bas memlekettik sanıtarııalyq dárigeri arnaıy qaýlyǵa qol qoıdy, dep habarlaıdy Egemen.kz Densaýlyq saqtaý mınıstrligi Sanıtarııalyq-epıdemıologııalyq baqylaý komıtetine silteme jasap.
Qaýlyda halyqtyń densaýlyǵyn qorǵaýǵa baǵyttalǵan sanıtarııalyq-epıdemııaǵa qarsy jáne sanıtarııalyq-profılaktıkalyq sharalar kesheni kózdelgen. Atap aıtqanda, 2025 jylǵy 15 qyrkúıekten bastap turǵyndardy tumaýǵa qarsy vaksınasııalaý bastalady.
Medısınalyq uıymdarda kireberiste súzgilerdiń jumysy qamtamasyz etiledi, sonymen qatar maska taǵý jáne antıseptıkterdi paıdalaný mindetteledi.
JRVI, tumaý jáne COVID-19 belgileri baıqalǵan júkti áıelderge jáne bir jasqa deıingi balalarǵa úıge kelip, birinshi kezekte medısınalyq qyzmet kórsetý tártibi engiziledi.
Mektepke deıingi mekemelerde kún saıyn tańerteń balalardyń densaýlyǵyn tekserý (tańerteńgi súzgi) júrgiziledi. Aýrý belgileri bar balalar balabaqsha ujymynan oqshaýlanady.
«Orta bilim berý uıymdarynda bir synyp oqýshylarynyń 20–30%-y bir ınkýbasııalyq kezeń ishinde JRVI-men aýyrsa, onda kabınettik oqytý júıesi toqtatylyp, 10 kún boıy jańa oqýshylar synypqa qabyldanbaıdy. Eger mekteptegi oqýshylardyń jalpy sanynyń 30%-y jáne odan kóp bóligi aýyrsa, mektep onlaın oqytý formatyna kóshiriledi», dep túsindirdi komıtettiń baspasóz qyzmeti.
Atalǵan sharalar 2025–2026 jyldardaǵy vırýstyq ınfeksııalardyń taralý qaýpin tómendetýge, halyqtyń densaýlyǵyn saqtaýǵa jáne densaýlyq saqtaý júıesiniń turaqtylyǵyn qamtamasyz etýge baǵyttalǵan.
Qaýlynyń tolyq mátinimen QR Densaýlyq saqtaý mınıstrliginiń Sanıtarııalyq-epıdemıologııalyq baqylaý komıtetiniń resmı saıtynda tanysýǵa bolady.