Túrkistan oblysy men Qytaı Halyq Respýblıkasynyń Baıan-Ǵol Mońǵol avtonomııalyq aımaǵy strategııalyq áriptestik ornatty. О́ńirge resmı saparmen kelgen Baıan-Ǵol okrýgi Halyq Úkimeti tóraǵasynyń birinshi orynbasary Chjý Daııýn bastaǵan memlekettik jáne isker delegasııamen ekijaqty kelissózder nátıjesinde óńirler arasynda baýyrlastyq qarym-qatynas ornatý týraly kelisimge qol qoıyldy, dep habarlaıdy Egemen.kz.
Bul tarıhı qujat Túrkistan men Baıan-Ǵoldyń arasyndaǵy kópjaqty seriktestiktiń jańa kezeńin bastap qana qoımaı, eki el arasyndaǵy dostyq pen ózara senimge negizdelgen strategııalyq áriptestiktiń naqty kórinisine aınaldy. Baıan-Ǵol – Qytaıdaǵy iri maqtaly ólkelerdiń biri. Kezdesý barysynda Túrkistan oblysynyń ákimi Nuralhan Kósherov Baıan-Ǵol delegasııasyn quttyqtaı otyryp, óńiraralyq qatynastardy damytýdyń mańyzdylyǵyn atap ótti. «Búgingi seriktestigimiz – ótken jyly Qytaı Halyq Respýblıkasyna jasaǵan issaparymyz barysynda Sizdermen ótkizilgen kezdesýdiń naqty nátıjesi. Sol sapar aıasynda birqatar ózekti jobalar talqylanyp, ózara yntymaqtastyqtyń berik negizi qalanǵan bolatyn. Osy bastama óz jalǵasyn taýyp, eki jaqqa da tıimdi naqty nátıjelerge jetkizetin berekeli seriktestikke aınalady dep senemiz», dedi Nuralhan Kósherov.
Al Chjý Daııýn myrza óńiraralyq qatynastardy damytýdyń mańyzdylyǵyna toqtalyp, baýyrlas óńirler arasyndaǵy ózara senimge negizdelgen áriptestik baılanystardy keńeıtý, birlesken jobalardy júzege asyrý jáne tájirıbe almasý ekijaqty yntymaqtastyqty jańa deńgeıge kóteretinin atap ótti.
Kezdesý barysynda taraptar agroónerkásip kesheninde birlesken kásiporyndar qurý, tehnologııalar men ǵylymı zertteýler almasý, turaqty eksport-ımport júıesin qalyptastyrý máselelerin talqylady. Sondaı-aq Túrkistan oblysy men Baıan-Ǵol kásipkerleriniń 40-tan astam kompanııasy arasynda B2B kezdesýler ótti. Qytaılyq delegasııa túrli salada jumys isteıtin óńirlik kásiporyndarmen aýyl sharýashylyǵy, óńdeý, qurylys, jeńil ónerkásip, logıstıka jáne farmasevtıka salalarynda áriptestik ornatý múmkindikterin talqylady. Shara aıasynda eki óńirdiń ónerkásip ónimderiniń kórmesi uıymdastyryldy. Delegasııa músheleri Túrkistan oblysynyń «TURAN» arnaıy ekonomıkalyq aımaǵy men «Shaǵyn ónerkásiptik parkter» qyzmetimen tanysty.
Túrkistan oblysy