Búgin Qostanaı qalasynyń № 31 mektebi ashyq esik kúnin ótkizip, qonaqtardy joǵary kóńil kúımen qarsy alýda. Oqýshylardyń ata-analary men qala turǵyndary mekteppen jáne pedagogtarmen tanysa kele, balalarǵa jasalǵan jaǵdaılardy óz kózderimen kórip, suraqtaryn qoıýǵa múmkindik aldy, dep habarlaıdy Egemen.kz.
«Keleshek mektepteri» ulttyq jobasy aıasynda 2025 jylǵy 15 qańtarda esigin aıqara ashqan jańa mektep — bul jaı ǵana bilim ordasy emes, bul bolashaqqa kóshbasshylardy tárbıeleıtin ortalyq.
Jobalyq qýattylyǵy 1200 oqýshyǵa arnalǵan bul mektep, búginde 1000-nan astam oqýshy úshin bilim men ulttyq qundylyqtardyń úılesimi jarasqan ordaǵa aınaldy.
«Keleshek mektepteri» jobasynyń zamanaýı tehnıkalyq jabdyqtalýy HHI ǵasyrdyń negizgi daǵdylaryn: analıtıkalyq oılaýmen IT-quzyrettilikten bastap zertteý jáne shyǵarmashylyq qabiletterge deıin qalyptastyrýǵa jaǵdaı jasaıdy.
Salynyp jatqan mektepter zamanaýı talaptarǵa saı ınteraktıvti jáne pán kabınetterimen jabdyqtalǵan, oqýshylardyń jan-jaqty damýyna yqpal etetin jarqyn dızaınymen erekshelenedi.
Bıologııa, fızıka, hımııa jáne ınformatıka pándik kabınetterinde, STEM-zerthanada barlyǵy oqýshylardyń zertteý qabiletterin damytýǵa jáne bilim sapasyn arttyrýǵa baǵyttalǵan.
Mektebimizdiń eń basty baılyǵy – jańa oqý jylyna tolyq daıyn 66 bilikti pedagog. Olardyń árqaısysy oqýshylarǵa sapaly bilim berýge, olardyń boıyndaǵy talantty ashýǵa jáne jan-jaqty damýyna úles qosýǵa daıyn.
Mekteptegi barlyq oqýshylar qosymsha bilim berýmen tolyq qamtylǵan. Olardyń arasynda zamanaýı robototehnıka úıirmesinen bastap, qazaq halqynyń salt-dástúri men mádenıetin tereń uǵynýǵa baǵyttalǵan etno-baǵyttaǵy sabaqtarǵa deıin bar.
Jaıly kovorkıng-aımaqtar, belsendi jáne tynyshtyqta demalýǵa arnalǵan oryndar, memlekettik tildegi kitaptardyń úlken qory bar zamanaýı kitaphana jáne eki sport zaly oqýshylardyń jan-jaqty damýyna jasalǵan.
Oqýshynyń boıynda ulttyq qundylyqtardy qalyptastyrýǵa, halqymyzdyń salt-dástúrlerine, tiline jáne mádenıetine degen qurmet pen súıispenshilikti darytýǵa erekshe kóńil bólinedi.
Mektep – jańa zaman talabyna saı salynǵan bilim men tárbıe oshaǵy, onda ár bala óziniń dara jolyn taýyp, elimizdiń erteńine úles qosa alady.
Qostanaı oblysynda «Keleshek mektepteri» Ulttyq jobasy aıasynda 4500 oqýshy ornyna arnalǵan 6 mekteptiń qurylysy júrgizilýde.
Búgingi kúni Qostanaı aýdanynyń Zarechnyı aýylynda, Arqalyq qalasynda jáne oblys ortalyǵynyń jańa, qarqyndy salynyp jatqan «Aeroport» jáne «Bereke» shaǵyn aýdandarynda jalpy 3300 orynǵa arnalǵan memlekettik tilde oqytatyn 4 mektep paıdalanýǵa berildi.
Sondaı-aq osy jyly Áýlıekól aýdanynyń Qusmuryn aýylynda 300 oryndyq jáne Rýdnyı qalasynda 900 oryndyq mektepterdiń ashylýyn oqýshylar men olardyń ata-analary asyǵa kútýde.