Memlekettik keńesshi Erlan Qarın jastar uıymdarynyń kóshbasshylarymen kezdesý ótkizdi. On alty respýblıkalyq jastar uıymynyń ókili qatysqan kezdesýde ózekti máseleler men jańa jobalardyń jaı-japsary talqylandy, dep habarlaıdy Egemen.kz Aqordanyń baspasóz qyzmetine silteme jasap.
Erlan Qarın elimizde jastar bıliktiń barlyq deńgeıindegi sheshim qabyldaý úderisine tartylǵanyn atap ótti. Olardyń sany Parlament, máslıhat, qoǵamdyq keńes quramynda aıtarlyqtaı artty. Prezıdenttik jastar kadr rezerviniń qatysýshylary jaýapty qyzmetterge taǵaıyndalyp jatyr.
Jastar Prezıdent bastamalarynyń negizgi qozǵaýshy kúshi sanalady ári elimizdiń jasampazdyqqa negizdelgen kún tártibin qalyptastyrý men ilgeriletý isinde sheshýshi ról atqarady.
Birlesken jumystyń negizgi baǵyttaryn pysyqtaı otyryp, Erlan Qarın esirtkige qarsy is-qımyl máselesine aıryqsha toqtaldy. Memleket basshysy bıyl 13 tamyzda ótken Qaýipsizdik Keńesi otyrysynda nashaqorlyqty aýyzdyqtaýǵa baǵyttalǵan keshendi sharalar qabyldaýdy, bul iske jastar men eriktiler uıymdaryn tartýdy tapsyrǵan bolatyn. Memlekettik keńesshi jastar uıymdarynyń kóshbasshylaryn nashaqorlyqqa qarsy kúres jumystaryna belsene atsalysýǵa shaqyrdy. Sondaı-aq atalǵan keselmen kúreste memlekettik organdar men qoǵamdyq uıymdardyń birlesken kúsh-jigeri arqyly ǵana oń nátıjege qol jetkizýge bolatynyn erekshe atap ótti.
Erlan Qarın jastar uıymdary «Taza Qazaqstan» jalpyulttyq jobasyna eleýli úles qosqanyn jetkizdi. Osy bastama aıasynda shamamen 10 mıllıon adamnyń qatysýymen 1 myńnan astam ekologııalyq aksııa uıymdastyryldy. Memlekettik keńesshi jastar kóshbasshylarynyń nazaryn aldaǵy ýaqytta osy naýqannyń aýqymyn keńeıtý qajettigine aýdardy. Onyń aıtýynsha, «Taza Qazaqstan» ekologııalyq joba ǵana emes, sonymen birge azamattardyń jańasha oılaý ári minez-qulyq ıdeologııasyna, qazaqstandyqtardyń ómir saltyna aınalýǵa tıis.
Kezdesý sońynda Erlan Qarın memleket jastarǵa qoldaý kórsetip qana qoımaı, júrgizip jatqan reformalarda olarǵa negizgi róldi senip tapsyrǵanyn jetkizdi. О́z kezeginde jas býyn el bolashaǵy úshin ózderiniń jasampaz áleýetin barynsha iske asyrýǵa umtylýy qajet.