Búgin Astanada VIII Álemdik jáne dástúrli dinder kóshbasshylary sezi ótip jatyr. Jıynda Memleket basshysy Qasym-Jomart Toqaev Astana tórinde bas qosqan álemniń eń bedeldi rýhanı kóshbasshylary men basqa da qatysýshylarǵa iltıpat bildirip, Sezd jumysyna qoldaý kórsetkenderi úshin alǵys aıtty, dep habarlaıdy Egemen.kz.
Memleket basshysynyń aıtýynsha, Sezd alǵash qyzmetin bastaǵan sátten beri qazirgi zaman syn-qaterlerin ashyq talqylaıtyn biregeı alańǵa aınaldy. Kongreske qatysýshylardyń usynymdaryna sáıkes, Sezdiń 2033 jylǵa deıingi damý tujyrymdamasy ázirlenip, ol júzege asyrylyp jatyr.
«Atalǵan qujat bizdiń beıbitshilikti saqtaý, tatý-tátti ómir súrý jáne barshaǵa ortaq adamgershilik qundylyqtaryn berik ornyqtyrý sekildi ortaq maqsatymyzdy aıqyndaıdy. Geosaıası shıelenis ýshyqqan zamanda munyń bári aıryqsha mańyzdy. Sezdiń qorytyndy deklarasııasy resmı qujat retinde BUU Bas Assambleıalarynda taralady. Bul sezd jumysyna berilgen joǵary baǵa. Aldaǵy mereıtoılyq 80-shi sessııada da atalǵan úrdis jalǵasady dep úmittenemin», dedi Qasym-Jomart Toqaev.