Qostanaı oblysynda ótip jatqan «Qarasora-2025» jedel aldyn alý is-sharasy aıasynda psıhotroptyq zattardy saqtap, taratty degen kúdikpen 16 jastaǵy Temirtaý turǵyny ustaldy, dep jazady Egemen.kz.
Jasóspirimdi Rýdnyı qalalyq PB esirtki qylmysyna qarsy is-qımyl bóliminiń qyzmetkerleri qalalyq jaǵajaı mańynda ustaǵan. Kúdiktini tintý barysynda untaq tárizdi zat salynǵan shamamen 80 paket tabyldy.
Polısııa qyzmetkerleri jasóspirim jalǵa alǵan Qostanaı qalasyndaǵy páterge tintý júrgizip, elektrondy tarazylar, aq untaq qaldyǵy qalǵan júzdegen bos paket, sondaı-aq satýǵa daıyndap qoıǵan 200-den astam esirtki oramyn tapty. Tárkilengen untaqtyń jalpy salmaǵy shamamen jarty kılogramm bolady. Sot-hımııalyq saraptama tárkilengen untaqtyń sıntetıkalyq esirtki ekenin kórsetip otyr.
Tártip saqshylarynyń aıtýynsha, jasóspirim atalǵan qylmysqa áleýmettik jeliler arqyly tartylǵan. Messendjer arqyly «joǵary tabysy bar kýrerlik jumys» tapqan. Shyn máninde, onyń mindeti esirtki saqtaý, ony oblys kólemindegi qupııa oryndarǵa jasyryp qoıyp otyrý ǵana bolǵan.
Kúdiktige qatysty QR QK-niń erekshe iri kólemde psıhotroptyq zattardy zańsyz daıyndaý, saqtaý jáne tasymaldaý baby boıynsha qylmystyq is qozǵaldy. Qazir jasóspirim ýaqytsha ustaý ızolıatoryna otyr.
Polısııa qylmystyq toptyń uıymdastyrýshylaryn jáne jasóspirimniń eresek sybaılastaryn izdestirip jatyr.
«Jasóspirimderdi ınternet arqyly arbaý – esirtki bıznesiniń keń taralǵan tásiline aınalyp otyr. Sondyqtan ata-analardy balanyń bos ýaqytyn qalaı ótkizetininin jiti baqylap, onyń áleýmettik jelide ne istep, ne qoıyp jatqanyn baqylap qadaǵalap otyrýǵa shaqyramyz», dep habarlady oblystyq PD-nyń baspasóz qyzmeti.
«Qarasora-2025» jedel aldyn alý is-sharasy aıasynda óńirde búgingi bir kúnniń ishinde zańsyz aınalymnan 5 kg 570 gramm sıntetıkalyq esirtki tárkilengen.
Qostanaı oblysy