Premer-mınıstrdiń birinshi orynbasary Roman Sklıar Germanııa Federatıvtik Respýblıkasynyń Ekonomıka jáne energetıka mınıstri Katerına Raıhemen onlaın kezdesý ótkizdi.
Taraptar ónerkásip, energetıka, saýda, kólik, logıstıka, aýyl sharýashylyǵy jáne eki el úshin basqa da basym baǵyttar boıynsha saýda-ekonomıkalyq yntymaqtastyqty odan ári keńeıtý máselelerin talqylady.
Roman Sklıar qazirde Qazaqstan men Germanııa arasynda «shıkizat, ónerkásip jáne tehnologııalar» formýlasy boıynsha tıimdi kooperasııa júrgizýge múmkindik beretin negizdemelik sharttar men ınstıtýsıonaldyq tetikterdiń keshendi arhıtektýrasy qalyptasqanyn atap ótti. Bul eki tarap úshin de «win-win» nátıjelerine qol jetkizýge jol ashady.
Katerına Raıhe Qazaqstanmen energetıka jáne resýrstar salasyndaǵy yntymaqtastyq Germanııa ekonomıkasy úshin eń qajet baǵyttardyń biri ekenin jetkizdi.
Kezdesý sońynda taraptar ekijaqty ekonomıkalyq baılanystardyń barlyq spektri boıynsha kooperasııany nyǵaıtýǵa daıyn ekenin bildirdi.
Sonymen qatar taraptar 24 qyrkúıekte ótetin Qazaqstan-Germanııa Saýda-ekonomıkalyq yntymaqtastyq jónindegi úkimetaralyq jumys toby (ÚJT) 15-otyrysynyń kún tártibin talqylady.
Kelissózder qorytyndysy boıynsha Premer-mınıstrdiń birinshi orynbasary Roman Sklıar Germanııa Federatıvtik Respýblıkasynyń Ekonomıka jáne energetıka mınıstri Katerına Raıheni Astanaǵa saparmen kelýge shaqyrdy.