Qazaqstandaǵy salyq tártibine qatysty alańdatarlyq derekterdi Qarjy vıse-mınıstri Erjan Birjanov jańa Salyq kodeksin túsindirýge arnalǵan semınarda jarııa etti, dep habarlaıdy Egemen.kz.
«Búgingi kúni elimizdegi 2 mıllıon jeke kásipkerdiń 44%-y deklarasııada eshqandaı aınalym kórsetpeıdi nemese múlde deklarasııa tapsyrmaıdy. Bul shamamen 1 mıllıonǵa jýyq jeke kásipker óz aınalymyn jasyryp otyrǵanyn bildiredi. Jalpy alǵanda, bıznes sýbektileriniń tek 20%-y ǵana jylyna 1 mıllıon teńgeden joǵary salyq tóleıdi, al 80%-y salyq tólemeıdi», dedi Erjan Birjanov.
Onyń aıtýynsha, jaǵdaıdy baqylaý-kassalyq mashınalardy durys paıdalanbaý da ýshyqtyryp otyr.
«Qazir 400 myńnan astam kassalyq apparatynan múlde chek berilmeıdi. Al 260 myńy kúnine nebári bir ǵana chek beredi. Bul negizinen shaǵyn bızneske tán qubylys. Osyndaı jaǵdaıda salyq tártibi qalaı saqtalady? Bizdegi eń basty másele – salyqtyq tártiptiń álsizdigi» dep túsindirdi vıse-mınıstr.
Sonymen qatar ol memleket tarapynan qolǵa alynǵan yntalandyrý sharalarynyń tıimdiligin de atap ótti. Máselen, 10 óńirde iske asqan «salyqtyq keshbek» jobasy tutynýshylardy chek talap etýge úıretip, nátıjesinde chekter sany 1,5 esege artqan.
Qarjy mınıstrliginiń derekterine sáıkes, tirkelgen 2 mıllıon jeke kásipkerdiń basym bóligi zań júzinde nóldik esep tapsyrady, ári olardyń qatarynda jaldamaly qyzmetkerler joq.