15–19 qazan kúnderi Germanııanyń Frankfýrt qalasynda ótetin «Frankfurter Buchmesse 2025» halyqaralyq kitap jármeńkesinde Qazaqstan óz ulttyq stendin ashyp, otandyq baspalardyń jańa týyndylaryn álem jurtshylyǵyna tanystyrdy, dep jazady Egemen.kz.
15–19 qazan kúnderi Germanııanyń Frankfýrt qalasynda ótetin «Frankfurter Buchmesse 2025» halyqaralyq kitap jármeńkesinde Qazaqstan óz ulttyq stendin ashyp, otandyq baspalardyń jańa týyndylaryn álem jurtshylyǵyna tanystyrdy.
Bıyl 77-ret uıymdastyrylyp otyrǵan áıgili Frankfýrt kitap jármeńkesiniń qurmetti qonaǵy – Fılıppın memleketi. Álemniń túkpir-túkpirinen kelgen baspagerler men jazýshylar bas qosqan iri mádenı sharaǵa Qazaqstannan 30-dan astam delegasııa qatysýda. Olardyń qatarynda elimizdiń jetekshi baspalary – «Mektep», «Almatykitap», «Atamura», «ARMAN-PV», «Steppe & World Publishing», «Evero», «Kazformoms», «AmalBooks» jáne basqa da otandyq baspa ókilderi bar.
Qazaqstandyq stend QR Mádenıet jáne aqparat mınıstrliginiń qoldaýymen uıymdastyrylyp, halyqaralyq deńgeıdegi baspalarmen áriptestik baılanystardy damytýǵa jol ashty. Bıyl kórmege 350-ge jýyq qazaqstandyq kitap qoıylyp, olardyń ishinde kórkem ádebıet, ǵylymı jáne balalarǵa arnalǵan jańa basylymdar tanystyryldy.
Kórmeniń basty maqsaty – kitap saýdasyn halyqaralyq deńgeıde ilgeriletý, baspa naryǵyn damytý jáne jazýshylar men baspagerlerdiń ózara baılanysyn kúsheıtý. Qazaqstan stendine kelgen sheteldik qonaqtar elimizdiń ádebı álemimen, zamanaýı baspa isiniń damýymen jáne ulttyq mádenıetpen keńinen tanysý múmkindigine ıe boldy.
Jańa týyndylardyń tusaýkeseri
Kórme aıasynda birqatar mańyzdy tusaýkeserler ótkizildi. Atap aıtqanda, nemis jazýshysy Anja Tuckermann qatysqan jeti tilge aýdarylǵan «Abaıdyń qara sózderi. Urpaqqa Ulaǵat» kitabynyń tanystyrylymy úlken qyzyǵýshylyq týdyrdy.
Sonymen qatar, «Meniń Qazaqstanym» serııasyndaǵy «Uly tulǵalarǵa» arnalǵan «Shoqan. Shyǵystyń jaryq juldyzy», Orazaly Sábdenniń «Túrki, Álem órkenıeti, Qazaqstan jáne bolashaq» («Evero» baspasy), «Mektep» baspasynan shyqqan «Sımantıka. О́ıý-órnekter» (úsh tilde), «Arman-PV» baspasynyń «Kóshpendiler oıyndary / Nomad Games / Igry kochevnıkov», «Atamura» baspasynyń «Qazaqstan – qyzǵaldaqtar otany» atty eńbekteri men «Steppe & World Publishing» baspasynan jaryq kórgen Yrysbek Dábeıdiń «Qońyz», Úmit Jubanyshevanyń «Shańyraqtyń ıesin izdeımin» kitaptarynyń tusaýkeserleri bolmaq.
Sondaı-aq, aqyn Dúısenáli Álimaqynnyń «Amerıka ashqan qazaqtar» atty eńbeginiń tanystyrylymynda Germanııalyq jýrnalıst jáne aýdarmashy Artur Weigandt qatysady.
«AmalBooks» baspasynyń dırektory Baqytjan Buqarbaıdyń moderatarlyǵymen «Qazaqstandyq avtorlardyń eńbekterin shet tilderine aýdarý máseleleri jáne aýdarma isindegi múmkindikter men kedergiler» taqyryby talqylanady.
Al qazaq ádebıetiniń klassıkasy sanalatyn Mirjaqyp Dýlatovtyń «Baqytsyz Jamal» romanynyń tanystyrylymy erekshe formatta ótkizilmek.
Halyqaralyq áriptestikke jol
Qazaqstan Respýblıkasynyń Maındaǵy Frankfýrt qalasyndaǵy Bas konsýly ulttyq stendke arnaıy kelip, otandyq delegasııaǵa qoldaý bildirdi.
Kórme barysynda Kanada, Qytaı, Túrkııa, Ázerbaıjan, Danııa, Germanııa, Sıngapýr jáne basqa elderdiń baspagerleri qazaqstandyq áriptesterimen kezdesý ótkizip, yntymaqtastyqtyń jańa baǵyttaryn talqylady.
Sonymen qatar, qazaqstandyq ókilder ózge memleketterdiń stendterine baryp, baspa isi salasyndaǵy tájirıbe almasý men seriktestik múmkindikterin qarastyrdy.