Seýl qalasynda Prezıdent janyndaǵy Ulttyq ǵylym akademııasy men Koreıa ǵylymı-tehnıkalyq aqparat ınstıtýty (KISTI) ǵylym, tehnologııa jáne jasandy ıntellekt salasyndaǵy strategııalyq áriptestik týraly kelisimge qol qoıdy, dep habarlaıdy Egemen.kz.
Kelisim Qazaqstan men Ońtústik Koreıa arasyndaǵy ǵylymı-tehnologııalyq yntymaqtastyqtyń jańa kezeńin ashyp, «AI SilkNet» ǵylymı-tehnologııalyq forsaıt jáne boljamdy taldaý ortalyǵyn qurýdy kózdeıdi.
Jańa ortalyqtyń maqsaty - jasandy ıntellekt, úlken derekter jáne ssenarıılik modeldeý salalaryndaǵy Ońtústik Koreıanyń ozyq tehnologııalaryn Qazaqstannyń zııatkerlik áleýetimen ushtastyrý bolyp tabylady. Ortalyq Almaty qalasynda, Prezıdent janyndaǵy UǴA bazasynda ornalasady. Onyń qyzmetin Akademııa men KISTI-diń birlesken atqarýshy komıteti basqarady. Basqarý júıesi parıtet pen ózara tájirıbe almasý qaǵıdattaryna negizdelip, jetekshilik qyzmetti Qazaqstan men Ońtústik Koreıa ókilderi kezekpen atqaratyn bolady.
Azııadaǵy sýperkompıýterlik jáne taldamalyq tehnologııalar salasynda jetekshi orynǵa ıe KISTI júıeleriniń negizinde Qazaqstanda ǵylym men tehnologııanyń damý úrdisterin boljaýǵa, basym baǵyttardy aıqyndaýǵa jáne strategııalyq sheshimder qabyldaýdy memlekettik ári korporatıvtik deńgeıde qoldaýǵa múmkindik beretin ulttyq boljamdy taldaý jáne forsaıt júıesi qurylmaq.
Prezıdent janyndaǵy UǴA prezıdenti A. Kúrishbaev:
«Biz KISTI Prezıdenti doktor Sık Lıdiń qoldaýyn joǵary baǵalaımyz jáne «AI SilkNet» ortalyǵy - ǵylym men tehnologııanyń elderdi ortaq bolashaq jolynda biriktirýdiń jarqyn úlgisine aınalatynyna senemiz» dep atap ótti.
Qazirgi tańda jasandy ıntellekt strategııalyq oılaýdyń negizgi quralyna aınalýda. Qazaqstan úshin bul - reaktıvti basqarýdan proaktıvti basqarýǵa kóshý, ıaǵnı boljamdar men ssenarıılerdiń memlekettik saıasattyń ajyramas bóligine aınalady.
Ortalyqtyń qyzmeti ǵylymı jarııalanymdar, patentter men tehnologııalar boıynsha biryńǵaı sıfrlyq platforma men derekter bazasyn qurýǵa, sondaı-aq forsaıt-zertteýlerge arnalǵan boljamdy taldaý quraldaryn ázirleýge baǵyttalatyn bolady.
Ortalyq ǵylymı-tehnologııalyq ınfraqurylymdy damytý – kóptildi derekter bazalary men sıfrlyq platformalardy qurý, forsaıt jáne boljaý – tehnologııalyq boljaý, sýpeforsaıt jáne ǵylym men ınnovasııalardaǵy úrdisterdi taldaý ádistemelerin engizý, bilim almasý jáne kadrlar daıarlaý – birlesken bilim berý baǵdarlamalaryn, trenıngter men ǵylymı mektepterdi júzege asyrý, JI ekojúıesin damytý – zertteýshiler men bızneske qoldaý kórsetý, jasandy ıntellektini ekonomıka, ekologııa jáne densaýlyq saqtaý salalarynda qoldaný sııaqty negizgi basymdyqtardy qamtıdy.
KISTI analıtıkalyq quraldardy ázirleý, derekterdi óńdeý jáne tehnologııalyq boljaý baǵyttarynda saraptamalyq qoldaý kórsetedi.
Bolashaqta «AI SilkNet» ortalyǵynyń tájirıbesi Ortalyq Azııa elderine taralyp, derekterge negizdelgen boljaý men sheshim qabyldaý boıynsha óńirlik jeli qalyptastyrýǵa yqpal etpek.
Osy yntymaqtastyqtyń negizinde Qazaqstan, Ońtústik Koreıada ǵylym men tehnologııanyń ulttyq basymdyqtaryn aıqyndaý barysynda tıimdiligin dáleldegen ozyq ádistemeler men tájirıbelerge qol jetkizedi.
Almaty