Túrkistan tórindegi «Olympic Center» sport kesheninde eresekter arasynda qazaq kúresinen Azııa chempıonaty ótýde. Bıylǵy qurlyqtyq chempıonatqa Azııanyń 12 memleketinen – Qyrǵyzstan, Tájikstan, О́zbekstan, Túrkimenstan, Úndistan, Japonııa, Iran, Mońǵolııa, Pákistan, Nepal, Fılıppın, Bangladesh jáne Qazaqstannan 150-ge jýyq balýan baq synap jatyr, dep jazady Egemen.kz.
Azııa chempıonatynda erler men áıelder 16 salmaq dárejesi boıynsha boz kilemge shyǵyp, ózara myqtyny anyqtaıdy. Baıraqty básekeniń saltanatty ashylý rásiminde Túrkistan oblysy ákiminiń orynbasary Ertaı Altaev jarysqa qatysýshylardy quttyqtap, sáttilik tiledi. «Qazaq kúresi – halqymyzdyń ulttyq rýhy men batyrlyq bolmysynyń aınasy. Búgin Azııanyń eń myqty balýandary kıeli Túrkistanda bas qosyp, óz ónerin kórsetýde», – dedi Ertaı Kenjebekuly.
Sondaı-aq, Qazaq Kuresi assosıasııasynyń bas dırektory Damır Bekbosynov pen UWW uıymynyń bas tóreshisi Edmar Abdýlaev quttyqtaý sóz sóılep, sportshylarǵa jeńis pen sáttilik tiledi.
Bul dodada el namysyn qazaq kúresiniń tańdaýly sheberleri qorǵaıdy. Qazaqstan ulttyq quramasynyń sapynda 16 balýan (8 er, 8 áıel) synǵa túsedi.
TÚRKISTAN