Qazaqstan Ulttyq Banki 2025 jylǵy 28 naýryzdan bastap aınalymǵa engizilgen «Saq stıli» serııasyndaǵy nomınaly 1 000 teńgelik jańa banknottyń qorǵanysh elementterin tanystyrdy. Jańa úlgidegi aqsha belgisi ejelgi kóshpendiler mádenıetin beıneleıtin ulttyq naqysh pen zamanaýı qorǵanys tehnologııasynyń úılesimi, dep habarlaıdy Egemen.kz.
Jańa úlgidegi aqsha belgisi zamanaýı baspa tehnologııalarymen qorǵalǵan jáne jalǵan aqsha jasaýdan senimdi qorǵanysqa ıe.
Banknottyń bet jaǵynda altyn ıntaglıo tásilimen basylǵan joǵary bederli beıneler bar. Qazaqstan Respýblıkasynyń eltańbasy altyn metall boıaýmen erekshelenip, qolmen ustaǵanda jaqsy seziledi.
Bet jaq shetterindegi shyǵyńqy relefti elementter kórý qabileti nashar azamattarǵa arnalǵan.
Sonymen qatar, banknottyń betinde úzik-úzik túrinde kórinetin eki tústi qorǵanysh jip ornalasqan. Ony jaryqqa tosqanda jip birtutas bolyp kórinedi. Kólbeý burysh ózgergen kezde kók jáne qyzǵylt-sary tústerdiń ózara aýysýynan dınamıkalyq effekt baıqalady.
Banknotanyń aldyńǵy jaǵynda artefakt beınesindegi altyn tústes golografııalyq patch bar. Banknotany buryp qaraǵanda, nomınaldyń sandyq beınesi ulttyq oıý-órnekke aınalady.
Keri betinde kólemdi beıneni kórsetetin Spark elementi ornalasqan: ony eńkeıtkende túsi altynnan nefrıt reńine ózgeredi. Al keıbir kórkem elementter arnaıy ırıdıssentti boıaýmen basylyp, altyn tústes jyltyraǵyn beredi.
Sondaı-aq, banknottyń ishinde jaryq túskende anyq kórinetin sý belgisi – elektrotıp bar. Ol nomınaldyń beınesi túrinde kórinedi jáne banknottyń túpnusqalyǵyn tekserýdiń eń senimdi tásilderiniń biri sanalady.
Ulttyq Bank mamandary atap ótkendeı, ár azamat banknotty qolmen ustap, jaryqqa tosyp, eńkeıtip qaraý arqyly shynaıy aqshany jalǵanynan ońaı ajyrata alady.