«QazAvtoJol» ulttyq kompanııasy búgin Shyǵys Qazaqstan men Túrkistan oblysyndaǵy eki jol ýchaskesinde kólik qozǵalysyna shekteý qoıylǵanyn habarlady, dep jazady Egemen.kz.
5 qarasha tańǵy saǵat 8-den bastap ShQO-daǵy Osınovskıı asýynda tirkeme jáne jartylaı tirkeme júk kólikteriniń qozǵalysyna qys sońyna deıin ruqsat joq. Shekteý О́skemen – Altaı – Katon-Qaraǵaı – Rahman qaınary tas jolynyń ýchaskelerine engizilip otyr.
Al Túrkistan oblysyndaǵy kúre jolda shekteý jóndeý jumystaryna baılanysty qoıylǵan. Aımaqtaǵy A-15 avtojolynyń (Jızzah – Gagarın – Jetisaı – Kırov – Qyzylásker – Saryaǵash – Abaı – Jibek joly) 175 jáne 183 shaqyrymy aralyǵyndaǵy Keles aýdanyndaǵy ýchaskesi 10 qarashaǵa deıin jabyq bolady.
«QazAvtoJol» UK málimetinshe, bul ýchaskede kólik qozǵalysynyń kóp bolýy jóndeý jumystaryna kedergi keltirgen.