Qazaqstannyń ǵalamdyq ınvestısııalar jónindegi dóńgelek ústeli (KGIR-2025) aıasynda Syrtqy ister mınıstriniń orynbasary Álibek Qýantyrov sheteldik seriktestermen birqatar ekijaqty kezdesý ótkizdi. Is-shara barysynda saýda-ekonomıkalyq jáne ınvestısııalyq ózara is-qımyldy nyǵaıtý máseleleri qaraldy, dep jazady Egemen.kz.
Alǵashqy kezdesý Birikken Arab Ámirlikteriniń Investısııalar jónindegi vıse-mınıstri Mýhammed Abdýrrahman Alhaýımen ótti. Taraptar saýda jáne ınvestısııalyq yntymaqtastyqty keńeıtý, sheteldik ınvestısııalardy tartý salasyndaǵy tájirıbe almasý, sondaı-aq birlesken ınfraqurylymdyq jáne ındýstrııalyq jobalardy iske asyrý perspektıvalaryn talqylady.
Erekshe nazar – Qazaqstan-BAÁ strategııalyq ınvestısııalar platformasy sheńberindegi kooperasııa múmkindikterine jáne memlekettik-jekemenshik seriktestik salasyndaǵy úzdik tájirıbelermen almasýǵa aýdaryldy.
Kelesi kezdesýde Á.Qýantyrov «Orascom Construction PLC» kompanııasynyń bıznesti damytý jónindegi vıse-prezıdenti Tamer Shafıkpen kelissózder júrgizdi. Taraptar kompanııanyń elimizdegi ınfraqurylymdyq jáne energetıkalyq jobalarǵa, sonyń ishinde sý elektr stansalarynyń, gaz elektr stansalarynyń jáne sýmen jabdyqtaý nysandarynyń qurylysyna qatysý áleýetin sóz etti.
Basqosý qorytyndysynda ekijaqty strategııalyq seriktestikti damytýǵa, kompanııanyń bizdiń eldegi basym ınfraqurylymdyq jobalarǵa qatysýyna jáne energetıka, sý resýrstary men kólik ınfraqurylymy salalarynda ınjenerlik-tehnologııalyq sheshimdermen almasýǵa ózara múddelilik bildirdi.
«Kazakh Invest» ulttyq kompanııasy SIM Investısııalar komıtetimen birlesip, KGIR-2025 ınvestısııalyq tregi sheńberinde qol jetkizilgen ýaǵdalastyqtardy iske asyrýdy jáne ınvestorlarmen jumysty úılestirýdi jalǵastyrady.
Aıta keteıik, «Orascom Construction PLC» – Taıaý Shyǵys pen Soltústik Afrıkadaǵy eń iri halyqaralyq merdigerlerdiń biri. Kompanııa álemniń 20-dan asa elinde 200-den asa belsendi jobany júzege asyryp keledi. Onyń portfeline qýaty 30 GVt-tan asatyn energetıkalyq nysandar, AQSh, Egıpet jáne Saýd Arabııasyndaǵy ınfraqurylymdyq jobalar, sondaı-aq táýligine 17 mln tekshe metr sý tazartý jáne tushylandyrý stansalary kiredi. Sondaı-aq «Orascom» – Afrıkadaǵy alǵashqy «jasyl» sýtek óndiretin keshenniń jáne qýaty 650 MVt bolatyn Red Sea Wind Farm jel elektr stansasynyń ázirleýshisi.
Eske salsaq, Astanada jahandyq ınvestısııalar jónindegi VIII qazaqstandyq dóńgelek ústel ótti. Forýmǵa 50-den asa elden myńnan asa iri ınvestorlar men kompanııa basshylary keldi. Jıyn nátıjesinde jalpy somasy 7,5 mlrd dollar bolatyn 49 kelisimge qol qoıyldy. Onyń 3,8 mlrd dollary – naqty kommersııalyq jobalar.
Bıylǵy 9 aıda IJО́ 6,3%-ǵa, al ınvestısııa kólemi 13,5%-ǵa ósken. Moody’s agenttigi Qazaqstannyń kredıttik reıtıngin «Turaqty» degen deńgeıge kótergen.