Soltústik Qazaqstan oblysynda Maǵjan Jumabaev aýdanynyń Jastar resýrstyq ortalyǵy býhgalteri birneshe jyl boıy bıýdjet qarajatyn óz shotyna zańsyz aýdaryp kelgeni anyqtaldy. Áıel adamǵa qatysty sot úkimi shyqty, dep habarlaıdy Egemen.kz.
Tekserý barysynda belgili bolǵandaı, ortalyqtyń esepshisi 2020 jyldyń qańtarynan 2025 jyldyń aqpanyna deıin óz atyna jalpy somasy 17 mıllıon teńge bolatyn jalaqy men ózge de tólemderdi zańsyz aýdaryp otyrǵan.
Atalǵan derek boıynsha aýdan prokýratýrasy Qylmystyq kodekstiń 189-baby 4-bóliginiń 2) tarmaǵy («Senip tapsyrylǵan bótenniń múlkin ıemdený nemese jymqyrý») boıynsha sotqa deıingi tergeýdi bastaǵan.
«Maǵjan Jumabaev aýdandyq sotynyń 2025 jylǵy 29 qyrkúıektegi úkimimen esepshi kináli dep tanylyp, barlyq menshik nysanyndaǵy uıymdarda materıaldyq jaýapkershilik pen býhgalterlik qyzmetke baılanysty laýazymdardy atqarý quqyǵynan aıyra otyryp, 7 jylǵa bas bostandyǵynan aıyryldy. Úkim zańdy kúshine endi», delingen habarlamada.
Sonymen qatar, sottalýshynyń jas balasy bolǵandyqtan, jazany óteý merzimi 2028 jyldyń 27 qyrkúıegine deıin, ıaǵnı bala on tórt jasqa tolǵanǵa deıin keıinge qaldyryldy.
Memleketke keltirilgen zalal ishinara ótelgen.