Densaýlyq saqtaý mınıstri Aqmaral Álnazarova Qostanaı oblysynyń jedel medısınalyq járdem qyzmeti mekemelerine 50 jańa avtokóliktiń kiltin tabys etti. Saltanatty rásim oblys ákimdiginiń aldyndaǵy alańda ótti, dep habarlaıdy Egemen.kz.
Jańa kólikter Qostanaıdaǵy «Allur» zaýytynda qurastyrylǵan. 40 avtokólik shuǵyl kómek kórsetýge arnalǵan. Qalǵany – reanımobılder. Jalpy quny 1,2 mlrd teńge bolatyn jedel járdem kólikteri oblys ákimdiginiń qoldaýymen 5 jyldyq merzimge lızıng baǵdarlamasy boıynsha satylyp alynǵan.
Zaýyttan jańa shyqqan avtokólikter halyqaralyq talaptarǵa saı zamanaýı medısınalyq qurylǵylarmen jabdyqtalǵan.
«Halyqqa sapaly, qoljetimdi ári ýaqtyly medısınalyq kómek kórsetý – memlekettiń basty mindetteriniń biri. Memleket basshysy búginde densaýlyq saqtaý júıesin damytýdy, dárigerlerge qoldaý kórsetýdi júktep otyr. Sońǵy jyldary aýyldyq jerlerde 600-den astam medısınalyq nysan salynyp, paıdalanýǵa berildi. Jyl sońyna deıin qalǵan 55 nysandy tapsyryp, Prezıdenttiń tapsyrmasyn tolyq oryndaımyz. Sonyń ishinde Qostanaı oblysynda 25 nysannyń qurylysy júrip jatyr», dedi mınıstr.
Jańa kólikter osy aptanyń sońyna deıin oblysqa qarasty qalalar men aýdandarǵa jetkiziledi.
Densaýlyq saqtaý salasyn damytýǵa memleket tarapynan erekshe kóńil bólinip otyrǵanyn aımaq basshysy da atap ótti.
«Memleket basshysy densaýlyq saqtaý salasyn damytýǵa, onyń ishinde materıaldyq-tehnıkalyq bazany nyǵaıtýǵa erekshe nazar aýdaryp otyr. Osy tapsyrmalardy oryndaý úshin óńirde aýqymdy jumystar atqarylyp jatyr. Aýyldyq jerlerde medısınalyq nysandardyń qurylysy belsendi júrip jatyr. Byltyr 28 nysan salynsa, jyl sońyna deıin taǵy 4 medısınalyq ortalyq paıdalanýǵa beriledi. Nátıjesinde aýyldarda 32 jańa medısınalyq mekeme jumys isteıdi. Bul nysandar zamanaýı jabdyqtarmen qamtamasyz etilgen. Munyń bári aýyl turǵyndary úshin úlken kómek», dedi Qumar Aqsaqalov.
Oblys ákiminiń aıtýynsha, buǵan deıin jedel járdem qyzmetine tıesili júz mashınanyń 76 paıyzy eski bolǵan. Jańa kólikter berilgen soń, atalǵan qyzmet paıdalanatyn avtokólikterdiń 90 paıyzy jańaryp otyr.