Astanadaǵy Ulttyq arhıvte Mádenıet jáne aqparat mınıstrliginiń qoldaýymen «Arhıv-2025: arhıvtegi amanat» atty respýblıkalyq ǵylymı-tájirıbelik konferensııa ótti. Arhıv, qujattama jáne kitap isi komıtetiniń tóraǵasy Rýstam Álı Mádenıet jáne aqparat mınıstri A.Balaevanyń quttyqtaý hatyn oqyp, is-shara shymyldyǵyn ashty.
– Sizder elimizdiń tarıhı-mádenı murasy men baǵa jetpes jádigerlerin saqtaý, olardy ǵylymı aınalymǵa engizý, keleshek urpaqqa jetkizý jolynda qajyrly qyzmet etip kelesizder. Eldiń zııatkerlik menshigi men mádenı ıgiliginiń tutastyǵyn saqtap, arhıv isin jetildirip, aýqymdy jobalardy júzege asyrǵandaryńyz úshin alǵysym sheksiz, – degen mınıstr quttyqtaýynda.
Is-shara barysynda «Arhıv-2025» baǵdarlamasy boıynsha atqarylǵan jumystar men qol jetkizilgen nátıjeler talqylanyp, beınerolıkter men kórme materıaldary usynyldy. Sonymen qatar arhıv mekemeleriniń materıaldyq-tehnıkalyq bazasyn jańǵyrtý, sıfrlyq júıege engizý baǵytynda atqarylǵan jumystar tanystyryldy.
2020 jyldan bastaý alǵan joba aıasynda respýblıkalyq arhıvterdiń ǵylymı-ekspedısııalary Germanııa, Polsha, Chehııa, Túrkııa, Fransııa, Majarstan, Úndistan, Iran, Mysyr, Qyrǵyzstan, Reseı Federasııasy, Ázerbaıjan, Belarýs, Qatar syndy 14 elde anyqtaý jumystaryn júrgizgen. Ǵylymı zertteý nátıjesinde 913–1990 jyldar aralyǵyndaǵy el tarıhyna qatysty 7000-nan asa qundy qujat jınaqtalyp, ǵylymı aınalymǵa engizilgen.
– Bul konferensııada keıingi bes jyldyq jumystyń nátıjesi baıandalyp otyr. Alys-jaqynnan ákelgen qujattar búgingi is-sharada kórsetiledi. Dástúrli baıandamalardyń ornyna elimizdegi barlyq negizgi arhıvter atqarǵan jumystar beınebaıan arqyly kóringeli otyr. Iаǵnı ótkeli otyrǵan is-sharanyń aýqymy keń, aıtary mol. Bizdiń jasap otyrǵan eńbekterimizdiń naqty kórsetkishteri aıqyndalmaq, – dedi Ulttyq arhıv dırektory Saǵıla Nurlanova.
Kóne qujattar qatarynda 918 jyly Temir hannyń Saıbek hanǵa elshi jiberip Buryndyqpen mámilege kelýi týraly derekter jáne Shyǵys Túrkistan halqynyń táýelsizdigimen bostandyǵy úshin kúresken Ospan batyr týraly Nurǵojaı batyrdyń estelikteri bar. Sonymen qatar mádenıet, ǵylym, túrli salalar men qazaqtyń turmys-tirshiligi, salt-dástúrine qatysty qujattardyń mańyzy zor. Arasynda áıgili kúıshi Dına Nurpeıisovanyń qatysýymen túsirilgen qysqa beınesıýjet, bıshi Shara Jıenqulova týraly derekter arhıv qoryna engen.
Aıta keteıik, konferensııaǵa Parlament Májilisiniń depýtattary, Mádenıet jáne aqparat mınıstrliginiń ókilderi, respýblıkalyq jáne oblystyq arhıvterdiń basshylary, arhıv salasynyń mamandary, tarıhshy-ǵalymdar qatysyp, oı-pikirlerin bildirdi.