Elimizdiń Densaýlyq saqtaý mınıstrligi dári-dármek baǵasynyń ashyqtyǵyn arttyrý maqsatynda Naqty Onim qosymshasynda jańa sıfrlyq servısti iske qosty. Endi el azamattary dáriniń shekti baǵasyn tekserip, shaǵymdana alady, dep habarlaıdy Egemen.kz.
Esterińizge sala keteıik, 2024 jyldyń shildesinen bastap Qazaqstanda barlyq dári-dármek mindetti túrde tańbalanýy tıis. Bul júıe pasıentterdi jalǵan ónimderden qorǵap, dáriniń zaýyttan dárihanaǵa deıingi jolyn tolyq baqylaýǵa múmkindik beredi.
Tańbalaý nátıjesinde tegin beriletin preparattardyń zańsyz satylý derekteri anyqtalǵan. Bas prokýratýramen birlesken tekserister bastaldy. Mınıstrliktiń málimetinshe, júıeniń ashyqtyǵy farmasevtıka salasyndaǵy salyq túsimderin 24 paıyzǵa arttyrǵan.
Sonymen qatar kepildendirilgen tegin medısınalyq kómek jáne mindetti medısınalyq saqtandyrý baǵdarlamalary boıynsha 2900 dári-dármektiń baǵasy qaıta qaralǵany habarlandy. Sondaı-aq, bıylǵy jyldyń qazan aıynda bólshek saýda jelisin baqylaý aıasynda eń tanymal dári-dármekterdiń baǵasy orta eseppen 11%-ǵa tómendedi.
Búgin Densaýlyq saqtaý mınıstrligi ambýlatorııalyq dári-dármekter tizimine engizilgen ózgeristerge qatysty túsinikteme berdi. Qant dıabeti, revmatoıdty artrıt, serebraldy sal aýrýy jáne basqa da sozylmaly aýrýlary bar naýqastar qajetti dári-dármekterdi tolyq kólemde alýdy jalǵastyrady.
Aıta keteıik, bıyl 1 723 dári men medısınalyq buıym saraptamadan ótip, onyń ishinde sapasyz dep tanylǵan 43 ataýly preparat naryqtan alynǵan.