Azamattyq avıasııa akademııasynyń doktoranty Nursultan Tompıevtiń jobasy avıasııa salasyndaǵy álemdik úzdik úsh bastamanyń qatarynan kórindi. Onyń jumysy «Sheikh Mohammed Bin Rashid Al Maktoum Global Aviation Award» bedeldi halyqaralyq syılyǵyna laıyq dep tanyldy. Marapat Monreal qalasynda Halyqaralyq azamattyq avıasııa uıymynyń (IKAO) 42-assambleıasynda tabystaldy.
Jobany jas ǵalym Nursultan Tompıevtiń jetekshiligimen «Qazaeronavıgasııa» RMK mamandary – M.Asylhanov, A.Ahmetbaev, A.Aqqulov birlesip ázirlengen. «Jasyl dálizder» dep atalatyn joba – halyqaralyq júk reısterinde turaqty avıasııalyq otyndy (SAF) paıdalanýǵa áýe tasymaldaýshylardy ekonomıkalyq turǵydan yntalandyrýǵa arnalǵan álemdegi alǵashqy júıe. Bul bastama turaqty avıasııalyq otyndy qoldanatyn avıakompanııalarǵa aeronavıgasııalyq alymdardy tómendetýdi, ekologııalyq otyn kólemin anyqtaýǵa arnalǵan «Book & Claim» mehanızmin paıdalanýdy, CO₂ shyǵaryndylary men kondensasııalyq izderdiń áserin ǵylymı modeldeýdi, sondaı-aq 2026 jyly qanatqaqty jobany iske qosyp, keıinnen keńeıtýdi kózdeıdi.
Atalǵan marapatqa «Akademııalyq uıymdar – magıstratýra jáne doktorantýra» atalymy boıynsha usynylǵan. Baıqaýǵa 52 elden 84 joba men 194 qatysýshy qatysqan. Nátıjesinde, otandyq joba Germanııa men AQSh-tyń bastamalaryna ǵana jol berip, turaqty avıasııa salasyndaǵy ulttyq ǵylym men ınnovasııanyń joǵary deńgeıin dáleldeı kele, úshinshi oryndy ıelendi.
«IKAO deńgeıinde moıyndalý – komandamyzdyń eńbegine berilgen baǵa ǵana emes, sonymen qatar elimizdiń áýe keńistigin Eýropa men Azııa arasyndaǵy «jasyl avıasııalyq kópirge» aınaldyrý jolyndaǵy mańyzdy qadam. Munda ekologııa men ekonomıka birtutas úlgide jumys isteıdi. Bul marapat – tek jeke jetistik emes, júıeli ǵylymı kózqaras pen jańasha oılaý búkil salany jahandyq deńgeıde ózgertetinin dáleldeıtin belgi. Biz elimizde týyndaǵan ıdeıalar álemdik úzdik jobalarmen básekelesetinin jáne turaqty avıasııanyń jańa baǵyttaryn aıqyndaı alatynyn kórsettik», dedi joba jetekshisi N.Tompıev.
Onyń aıtýynsha, ekologııalyq turǵydan alǵanda joba SAF qoldanylatyn reısterde kómirqyshqyl gazynyń 70-80%-ǵa deıin azaıtýǵa múmkindik beredi. Ekonomıkalyq jaǵynan bul elimizdiń áýe keńistiginiń tranzıttik avıatasymaldaýshylarǵa tıimdi, al ımıdjdik turǵydan eldiń turaqty avıasııa salasyndaǵy jańashyl qatysýshy retindegi bedelin bıiktetedi.
«Sheikh Mohammed Bin Rashid Al Maktoum Global Aviation Award» – avıasııalyq ınnovasııalar, turaqty damý jáne sıfrlyq transformasııa salasyndaǵy úzdik álemdik tájirıbelerdi damytý maqsatynda beriletin halyqaralyq marapat.