Aqtóbe oblysy – Qazaqstannyń batysyndaǵy jetekshi ındýstrııalyq ortalyqtardyń biri. О́ńir ekonomıkasyn ártaraptandyrýdyń negizgi býyny sanalatyn óńdeýshi ónerkásip sońǵy jyldary qarqyn alyp, ınvestorlar úshin tartymdy aımaqqa aınalyp otyr, dep jazady Egemen.kz.
2025 jyly iske qosylǵan «Aqtóbe» arnaıy ekonomıkalyq aımaǵy - óńirdiń jańa ındýstrııalyq draıveri, syrtqy jáne ishki ınvestorlardyń nazaryn aýdarýda. Aýmaǵy 570 gektardy qamtıtyn AEA halyqaralyq áýejaıdyń aýmaǵynda ornalasqan, bul óndiristik jáne logıstıkalyq jobalardy ornalastyrýǵa aıtarlyqtaı múmkindik beredi. Aımaq qatysýshylaryna salyqtyq jáne kedendik jeńildikter paketi usynylady, sondaı-aq qajetti ınfraqurylym kezeń-kezeńimen jetkizilip jatyr.
Sonymen qatar óńirdegi «Hromtaý» ındýstrıaldyq aımaǵynda da jańa jobalarǵa arnalǵan daıyn alańdar qurylýda. 150 gektar aýmaqta jol, elektr, sý jáne gaz jelileri tolyq qamtamasyz etilip, ınvestorlardyń óndiristi qysqa merzimde iske qosylýyna múmkindik bar.
Aqtóbeniń geografııalyq ornalasýy da óńirdiń tartymdylyǵyn kúsheıtedi. Batys Eýropa – Batys Qytaı kólik dálizi, Reseı jáne Ortalyq Azııa baǵyttaryna shyǵatyn temirjol toraby, sondaı-aq halyqaralyq áýejaı logıstıkanyń damýyna serpin beredi.
Mamandardyń aıtýynsha, búginde ınvestorlar tek ınfraqurylymǵa ǵana emes, óńirdiń salalyq ahýaly týraly kásibı, dáleldi jáne júıeli aqparatqa muqtaj. Osyǵan baılanysty óńirlerge ár toqsan saıyn taldamalyq sholýlar men ınvestısııalyq materıaldar daıyndaý mindeti qoıylǵan. Bul baǵytta jetekshi konsaltıngtik kompanııalar tartylady.
О́ńirdiń kadrlyq áleýeti de mańyzdy faktorlardyń biri. Aqtóbedegi joǵary oqý oryndary men kolledjder ınjenerlik jáne tehnıkalyq mamandyqtar boıynsha mamandar daıarlap, óńdeý salasynyń kadr tapshylyǵyn óteýge úles qosyp keledi.
Investorlar úshin memlekettik qoldaýdyń da keń spektri usynylady: ınvestısııalyq kelisimsharttar, sýbsıdııalar, ınfraqurylym jetkizý, salyqtyq jeńildikter, sondaı-aq «Kazakh Invest» pen óńirlik ınstıtýttardyń tolyq súıemeldeýi qarastyrylǵan.
Sarapshylardyń pikirinshe, óńirdiń strategııalyq josparynda eksporttyq áleýetti arttyrý, jańa óndiristerdi iske qosý jáne ekonomıkany tereń ártaraptandyrý maqsaty tur.
Osylaısha Aqtóbe oblysy – óńdeýshi ónerkásip jobalaryn júzege asyrý úshin ınfraqurylymdyq, ınstıtýsıonaldyq jáne ekonomıkalyq turǵyda qolaıly jaǵdaı jasaı alǵan óńir retinde erekshelenip otyr.