Dárýmender men antıoksıdanttar JRVI aýrýlarynyń aldyn alýǵa jáne sýyq mezgilde aǵzany qalpyna keltirýge kómektesedi. Bul týraly nýtrısıolog dárigerler aıtty, dep habarlaıdy Egemen.kz.
As mázirine sıtrýsty jemisterdi - apelsın, lımon, mandarın jáne greıpfrýt qosqan jón. Quramynda S dárýmeni joǵary bolǵandyqtan, bul jemister ımmýndyq júıeni kúsheıtip, kollagen sıntezin yntalandyrady, sondaı-aq tinniń jazylýyn jyldamdatyp, shyryshty qabyqtardy nyǵaıtady, ınfeksııalardyń aǵzaǵa enýine jol bermeıdi.
– S dárýmeniniń negizi kózi – kıvı jemisi, onyń quramynda sondaı-aq antıoksıdanttar men talshyqtar kóp, al olar ımmýnıtetke áser etetin ishek mıkrobıotasynyń densaýlyǵy úshin mańyzdy. Anardyń da qabynýǵa qarsy emdik ereksheligi bar, ol qan aınalymyn jaqsartady jáne quramynda vırýsqa qarsy áser etetin polıfenoldar bar, – dedi nýtrısolog Alla Porhýn Gazeta.ru basylymyna bergen suhbatynda.
Onyń aıtýynsha, sonymen qatar JRVI kezinde banannyń, alma men qurmanyń da paıdasy mol.
– Kalııge baı banan dene qyzýy kóterilgende sý-tuz teńgerimin saqtaýǵa kómektesedi, al quramynda pektın mólsheri joǵary alma ishek jumysyn qalypqa keltiredi, bul ımmýndyq reaksııaǵa oń áser etedi. Al qurmanyń quramyndaǵy A, S, R dárýmenderi, sondaı-aq ıod pen magnıı qabynýǵa qarsy oń áser etedi jáne qan tamyrlaryn kúsheıtetin qasıeti bar, – deıdi dáriger.
Sonymen qatar papaııa, karambola, feıhoa jáne lıchı sııaqty ekzotıkalyq jemisterdiń paıdasy kóp. Karambola antıoksıdanttyq qasıetke ıe S jáne A dárýmenderine baı, papaııada S jáne A dárýmenderinen basqa, as qorytýdy jaqsartatyn jáne tinderdiń qalpyna kelýine yqpal etetin papaın fermenti bar, lıchıde antıoksıdanttar, al feıhoada ıod kóp.
Dáriger as mázirine jıdekterdi qosýdyń mańyzdy ekenin jáne olardy konservilengen túrinde de tutynýǵa bolatynyn aıtty. Mysaly, tańqýraı men qaraqat tosaby qan tamyrlaryn nyǵaıtýǵa jáne qabynýdy azaıtýǵa kómektesetin polıfenoldar men basqa da bıologııalyq belsendi zattardan turady.