Jetisý oblysynda bıylǵy epıdemıologııalyq maýsym turaqty baqylaýda ótip jatyr. Oblystyq densaýlyq saqtaý basqarmasynyń málimetinshe, maýsym bastalǵaly jedel respıratorlyq vırýstyq ınfeksııanyń (JRVI) 45 674 jaǵdaıy tirkelgen. Onyń 30 912-si — 14 jasqa deıingi balalar, dep jazady Egemen.kz.
Vırýstyń taralýyna jol bermeý úshin medısınalyq uıymdar kúsheıtilgen rejımde jumys isteýde. MSAK deńgeıinde 29 mobıldi brıgada men 25 súzgi kabıneti ashylyp, turǵyndarǵa keńes beretin 48 telefon jelisi iske qosylǵan. Qajet bolǵan jaǵdaıda shuǵyl kómek kórsetýge 69 jedel járdem brıgadasy jumyldyryldy. Oblys boıynsha 82 myń adam tumaýǵa qarsy vaksına alyp úlgerdi. Stasıonarlarda 421 ınfeksııalyq tósek daıyndalǵan, qosymsha 196 tósek rezervte tur. О́ńirde aýyr jaǵdaıda jatqan pasıentter joq.
Halyq arasynda profılaktıka sharalaryn kúsheıtý maqsatynda aqparattyq-aǵartý jumystary belsendi júrgizilýde. Medısınalyq uıymdar 15 myńnan astam paraqsha taratyp, 1,5 myń adamdy qamtyǵan oqý semınarlary men kezdesýler uıymdastyrdy. Áleýmettik jelilerde JRVI men tumaýdyń aldyn alý jónindegi aqparat keńinen jarııalanyp, túsindirý jumystary jalǵasýda.
Respýblıka boıynsha da epıdemıologııalyq jaǵdaı turaqty. Qalypty tumaý vırýstary aınalymda júr, jańa nemese asa qaýipti shtamdar tirkelmegen. Sonyń ishinde A tumaýy vırýstarynyń biri — H3N2 («Gonkong tumaýy») anyqtalǵan. Bul shtamm 1968 jyldan beri álemde turaqty taralady jáne joǵary temperatýra, bas aýrýy, jótel sııaqty belgilermen sıpattalady. DDSU málimetinshe, bıyl jıi kezdesetin úsh shtamm — A (H1N1), A (H3N2) jáne V túrleri. Barlyǵy da «Grıppol+» vaksınasynyń quramynda bar, sondyqtan vaksınasııa aýrýdyń aýyr aǵymynyń aldyn alýda tıimdi bolyp otyr.