Memleket basshysy 5 qarasha kúni «Qazaqstan Respýblıkasy ishki saıasatynyń negizgi qaǵıdattary, qundylyqtary men baǵyttaryn bekitý týraly» Jarlyqqa qol qoıdy. Bul qujat elimizdegi ıdeologııalyq saıasattyń tuńǵysh ret júıeli ári birtutas túrde aıqyndalýyna múmkindik beredi, dep jazady Egemen.kz.
Memlekettik keńesshi Erlan Qarın óziniń maqalasynda, qoǵamda jańa etıka men qundylyqtardy ornyqtyrý qurǵaq uranmen emes, kezeń-kezeńimen júrgiziletin júıeli saıasat arqyly júzege asatynyn aıtty.
«Qoǵamda jańa etıka men qundylyqtar júıesin ornyqtyrý – bir kúnde atqarylatyn sharýa emes, bul kezeń-kezeńimen júzege asyrylatyn jumys. Oǵan qurǵaq uran, jyltyraq ıdeologııamen qol jetkizý – bos áýreshilik. Bul jerde jalań úgit-nasıhat tıimsiz. Tipti keri áser etýi – yqtımal. Bul bizdiń jolymyz emes. Biz jumystyń óz yrǵaǵymen, óz arnasymen júrgenin qalaımyz. Saıası pikir alýandyǵy jáne sóz bostandyǵy jaǵdaıynda eń durys qadam da osy bolmaq. Biz júıeli memlekettik saıasat arqyly adamdar arasynda qoǵamdyq ádep mádenıetin damytýdy kózdep otyrmyz. Keıingi ýaqytta júrgizilip jatqan jumysymyzdyń barlyǵy osyǵan saıady, deıdi ol.
Erlan Qarın jańa saıasattyń negizgi elementiniń biri retinde «Zań jáne tártip» qaǵıdaty aıqyndalǵanyn aıtty. Bul – jeke adam men qoǵamdyq qaýipsizdiktiń irgetasy.
«Prezıdent Qasym-Jomart Toqaev aıtqandaı, «Zań jáne tártip» memlekettik qurylystyń basty qaǵıdaty bolyp qala beredi. Álbette, zańdylyqty saqtaý – memlekettiń birden-bir basty mindeti. Biraq qoǵamnyń qoldaýynsyz bul iste naqty nátıjege qol jetkizý qıyn. Sol úshin qoǵamda qandaı da bir quqyq buzýshylyqqa, agressııa men zorlyq-zombylyqqa qarsy ımmýnıtet qalyptastyrý mańyzdy. Árıne, bul bir kúnde nátıje bermeıdi. Degenmen memleketimiz ustanǵan «Zań jáne tártip» qaǵıdaty qazirdiń ózinde qoǵamdaǵy oń ózgeristerge yqpal etip otyr», deıdi Memlekettik keńesshi.
Onyń aıtýynsha, keıingi bes jylda qylmystyq quqyq buzýshylyqtar eki ese azaıdy. Qoǵamdyq oryndardaǵy qylmys deńgeıi 80 paıyzǵa qysqardy. Zańǵa baǵyný mádenıetin ornyqtyrý qoǵamdy jańa sapalyq deńgeıge kóteredi.