«Otbasy bank» AQ Qyzylorda fılıaly jańa formattaǵy sharalardy qoldaıdy jáne iske asyrady. Ásirese ol halyqqa tıimdi bolsa, birden bilek sybana kirisedi. Oblystyq fılıal salymshylary men seriktesterine qoljetimdi baspanaǵa jetýdiń tetikterin tanystyrý, jınaq mádenıetin qalyptastyrý, turǵyn úı naryǵyndaǵy jańalyqtardy talqylaý úshin jyljymaıtyn múlik jármeńkesin uıymdastyrdy, dep habarlaıdy Egemen.kz.
Fılıal basshysy Ádiljan Sáýlebaevtyń aıtýynsha, bank qarjy ınstıtýty ǵana emes, árbir otbasynyń bolashaǵyna áser etetin uıymǵa aınaldy.
Jármeńkege kelýshilerdi qyzyqtyrǵan banktiń «Armanǵa jol» ónimi – óte tıimdi qural. Aldymen klıent depozıt ashady da, jumys berýshi mekemesiniń býhgalterimen kelisim jasaıdy. Býhgalter jalaqysynan belgilengen somany aı saıyn depozıtine aýdarady. Baspana alýdy armandaıtyn, biraq jalaqy alǵanda depozıt tolyqtyrýdy keıinge shegeretin, umytyp ketetin jandar úshin bul óte qolaıly.
Salymshy Ultaı Eshımova da búgingi sharaǵa kelipti. Ol buryndary páterlerin dollarlyq nesıemen rásimdegendikten tóleı almaǵanyn eske alady.
–Bárin satyp, qaryzdy jabýǵa týra keldi. Keıin osy Otbasy bankke aqsha jınaýǵa bolatynyn bildim. Biraq aldyndaǵy tájirıbem sátsiz aıaqtalǵandyqtan, bettemedim. Joldasym turaqty salymshy boldy. Alǵashqy úıdiń jarty somasyn jınadyq. Ekinshi baspanaǵa kóligimizdi satyp, aqshasyn saldyq. Úshinshi páterge zeınetaqy qoryndaǵy shekti somadan asqan qarjyny paıdalandyq. Sóıtip «Otbasy banktiń» arqasynda satýǵa májbúr bolǵan páterlerdi qaıta túgendedik, deıdi bank salymshysy.
Qyzylordada 2024 jyldan beri jas otbasylarǵa arnalǵan «Syr jastary» atty óńirlik baǵdarlama bar. Oblys ákiminiń qoldaýymen jergilikti bıýdjetten jyl saıyn 1,2 mlrd teńge, bankten 500 mln teńge bólinedi. Osyǵan deıin 100 jas otbasy baspanaly boldy, bıyl taǵy 100 otbasyǵa nesıe rásimdelýde.
Sol jaǵalaýdaǵy jańa úıden páter alǵan Baqytjan Rsaev – oblystyq kópbeıindi aýrýhananyń reanımatolog dárigeri.
«Jumys ornym jalǵa bergen páterge 80-100 myń teńge tólep turdym. Balalar ósken saıyn qalaıda óz baspanamyz bolý kerek dep oılaısyń. Ońtaıly múmkindikterdi izdestirip, «Syr jastary» baǵdarlamasy týraly bildik. Sóıtip bizdi úıli etetin eń qolaıly ári tıimdi baǵdarlama bolǵandyqtan «Otbasy bankke» aı saıyn 100 myń teńgeden aqsha saldyq. Mejeli 2 mıllıon aqsha jınalyp, ıpotekany 13 jylǵa rásimdedik. Aıyna 175 myń teńgeden tóleımin. Bastysy – óz úıimiz, jyly uıamyz», deıdi jas maman.
Bul baǵdarlamanyń qaryz boıynsha syıaqy mólsherlemesi jyldyq 5% (JTSM 5,2% bastap 5,7% deıin) bolǵandyqtan, baspanaly bolýǵa umtylatyndar sany kóp.
Adam ómiriniń sáýleli sáti – baspanaly bolǵan kez. «Otbasy bank» barshaǵa osy baqytty syılap keledi.