Qostanaı qalasyna Reseı ormandarynda shabylǵan jas shyrshalar ákeline bastady. Osyǵan oraı, tabıǵat qorǵaýshylar jergilikti ormandardaǵy qylqan japyraqty aǵashtardyń amandyǵyn qadaǵalaýdy kúsheıtti. Máselen, oblystyq orman sharýashylyǵy jáne janýarlar dúnıesi aýmaqtyq ınspeksııasy janynan qurylǵan mobıldi toptar 11 orman sharýashylyǵynda reıd ótkizip jatyr, dep habarlaıdy Egemen.kz.
«Búginde óńirde ormannyń sanıtarlyq jaı-kúıin jaqsartý jumystary júrip jatyr. Atalǵan is-shara aıasynda Orman sharýashylyǵy komıteti ruqsat bergen aýmaqtardaǵy aǵashtar ǵana kesiledi. Biraq jańa jylǵa arnaıy aǵash kesýge tyıym salynǵan. Al Qostanaıda ár jerde satyla bastaǵan jasyl shyrshanyń bári Reseıden ákelingen. Olardyń báriniń zańdy qujaty bolýy kerek. Onyń syrtynda, kórshi elden shyrsha ákep satyp jatqan kásipkerler munda kelgen soń Qazaqstannyń karantındik qaǵazyn alýy kerek. Syrttan kirip jatqan aǵashtardyń zań talaptaryna saı bolýyn oblystyq PD tabıǵat qorǵaý bólimi, taǵy basqa da múdelli oryndardyń mamandary qadaǵalaıdy. Biz oblystaǵy orman sharýashylyqtarymen birlesip reıdtik jumystar júrgizemiz. Ormanǵa jaqyn jerlerde, jol boıynda arnaıy beketter jumys isteıdi», deıdi oblystyq orman sharýashylyǵy jáne janýarlar dúnıesi aýmaqtyq ınspeksııasy basshysynyń orynbasary Talǵat Bermanov.
Qylqan japyraqty aǵashtardy zańsyz kesken nemese qujatsyz tasyǵan azamattarǵa zańda 1 metr aǵashqa 15 AEK kóleminde aıyppul belgilengen.
Qostanaı oblysy