ASTANA. 23 naýryz. Moldovadaǵy Gagaýzııa avtonomııaly ákimshilik terrıtorııalyq bólinisinde keshe bolyp ótken saılaýdyń qorytyndysy boıynsha Irına Vlah bul ólkeniń bashkany bolyp saılandy. Bul týraly «Polıt.Rý» habarlady.
«Moldovadaǵy oppozısııalyq sosıalıster partııasynyń lıderi Igor Dıdon óziniń Facebook-tegi paraqshasynda Irına Vlahty bashkan (aımaq basshysy) saılaýynda jeńiske jetýimen quttyqtady», - dep jazady portal.
«Bıýlletender 100% sanalyp shyqty. Irına Vlah 53%.-dan artyq daýys aldy. Gagaýzııanyń jańa bashkany – Vlah Irına Fedorovnany jeńisimen quttyqtaımyz», - dep jazdy Dodon.
Budan aldyn Gagaýzııa ortalyq saılaý komıssııasy saılaýǵa kelýshilerdiń aqyrǵy nátıjelerin jarııalaǵan bolatyn. Ol 58,1%-dy qurady. Gagaýzııa ortalyq saılaý komıssııasy saılaýdyń alǵashqy nátıjelerin dúısenbi kúni halyqqa jarııalaıtyn bolady.
Irına Vlah 1974 jylǵy 26 aqpanda Moldavııa KSR-niń Gagaýzııa aımaǵyndaǵy Komrat qalasynda týǵan. Moldovan saıasatkeri, Moldova parlamentiniń 2005 jyldan bergi depýtaty. Ol 1991 jyly Komrattyń Gaıdarjı atyndaǵy teoretıkalyq kolledjin úzdik bitirip, 1991-1996 jyldary Komrat memlekettik ýnıversıtetiniń zań fakýltetinen bilim alyp shyqty. Kásibı qyzmetin 1996 jyly Gagaýzııadaǵy Chadyr-Lýnga qalasy salyq ınspeksııasynyń zańgeri bolýdan bastady. 2005 jyly kommýnısterdiń tizimi boıynsha Moldova parlametine depýtat bolyp saılandy. Keıin bul partııadan shyǵyp ketti. Al bul saılaýǵa táýelsiz kandıdat retinde qatysty. Ol 2010 jylǵy saılaýǵa da qatysqan bolatyn. Onda birinshi týrda saılaýshylardyń úshten bir daýysyna ıe boldy. 2008 jyly doktorlyq dıssertasııa qorǵady.
Qazir Anna esimdi qyz ósirip otyr.
Vlah negizinen orys tilinde sóıleıdi.
Saılaýǵa 10 úmitker qatysty.
Gagaýzııa bashkany saılaýynda jeńiske jetken Irına Vlah ózine senim kórsetkenderi úshin saılaýshylaryna alǵys aıtyp, opponentterin aımaqtyń ıgiligi úshin birge jumys jasaýǵa shaqyrdy.
«Men Gagaýzııanyń birtutas bolǵanyn qalaımyn. Men bizdiń bárimizdiń aımaqtyń ıgiligi úshin birge jumys jasaýymyzdy qalaımyn», - dedi ol.
Jańa bashkan Moldovany gúldendirý Gagaýzııadan bastalatynyn aıtty.
Eske sala keteıik, Gagaýzııa – Moldovanyń ońtústik-shyǵysyndaǵy Býdjak dalasyn jaılap jatqan avtonomııaly ákimshilik terrıtorııalyq bólinistegi aımaq. Onda turatyn halyqtyń 80 paıyzyn túrki tildi, pravoslavıe dindi gagaýzdar quraıdy. Bul aımaqtaǵy jer-sý attarynyń ózi bizge baıaǵy ǵun, oǵyz, qypshaq dáýirlerinen habar beredi. Al qaısybir eldi mekenderdiń ataýlary qazaqtyń rý-taıpalarynyń nyspylaryna uqsas keledi. Solardyń arasynda Komrat (Qońyrat), Taraklııa (Taraqty) sekildi qalalar bar.
Murat Aıtqoja.
Derek, foto: Polıt.Rý