AMANAT» partııasy fraksııasynyń Májilistegi jetekshisi Elnur Beısenbaev búgin Májilistiń jalpy otyrysynda depýtattyq saýalyn Kólik mınıstri Nurlan Saýranbaevqa joldady. Depýtat taksı júrgizýshileri týraly máselelerdi kóterdi, dep jazady Egemen.kz.
Depýtattyń aıtýynsha, Qazaqstanda azamattardy tasymaldaý qyzmeti salasynda 500 myńnan astam taksı júrgizýshisi eńbek etedi. Alaıda bul kórsetkish áli kúnge deıin resmı túrde naqtylanbaǵan. Platformalyq servısterdiń eshqaısysy taksı júrgizýshileriniń naqty sany týraly tolyq derek usyna almaı otyr.
«Bul – qazirgi sıfrlyq qoǵam jaǵdaıynda aqylǵa qonymsyz jaǵdaı. Ásirese Memleket basshysy sıfrlandyrýǵa naqty mindetter qoıyp otyrǵan kezeńde bul másele asa ózekti.
Agregatorlar arqyly platformalyq jumyspen qamtý búginde halyqtyń kúndelikti ómiriniń ajyramas bóligine aınaldy. Olar jyl saıyn 150 mıllıonnan astam sapardy júzege asyrady. Bul – adamdardyń ómiri men densaýlyǵy. Biz olardy zańnamalyq deńgeıde qorǵaýǵa mindettimiz», dedi E.Beısenbaev.
Májilismenniń sózinshe, ártúrli derekter boıynsha kólemi 500 mlrd teńgege deıin jetetin bul naryqtaǵy quqyqtyq jáne zańnamalyq «oıyn erejelerimen» eń aldymen salalyq mınıstrlik pen agregatorlardyń ózderi aınalysýy tıis. Qoldanystaǵy zańnamada áli kúnge deıin agregatorlardyń (Yandex, InDriver, Aparu jáne basqalar) negizgi prosesterin kórsetpeıtin sovettik kezeńniń uǵymdary qoldanylyp keledi.
«Nátıjesinde olardyń qyzmeti is júzinde «sur aımaqta» qalyp otyr. Jaýapkershilik, qaýipsizdik standarttary, algorıtmderdiń ashyqtyǵy, saqtandyrý, jolaýshylar men júrgizýshilerdiń quqyqtaryn qorǵaý máseleleri quqyqtyq alańnan tys qalǵan.
«Taksı júrgizýshisi» uǵymynyń ózi naqty aıqyndalmaǵan. Júrgizýshi, taksopark jáne agregator arasyndaǵy jaýapkershilik, quqyqtar men mindetter bólinbegen, bul taksısterdiń áleýmettik qorǵalmaýyna alyp kelip otyr», dedi ol.
Elnur Sabyrjanulynyń pikirinshe, taksı júrgizýshileriniń kúndelikti medısınalyq tekserýden ótý talaby formaldy sıpatqa ıe bolyp, is júzinde oryndalyp jatqan joq. Sonymen qosa, saparlar saqtandyrylmaıtyndyqtan, jolaýshylar men júrgizýshilerdiń qaýipsizdigi máselesi de túsiniksiz kúıde qalyp otyr. Sondaı-aq, taksıster usynatyn málimetterdiń – júrgizýshi kýáliginiń, kóliktiń tehnıkalyq tekserýden ótkeni týraly jáne tehnıkalyq pasporttarynyń durystyǵy tekserilmeıdi.
«Nátıjesinde tapsyrystardy júrgizýshi kýáligi joq adamdardyń, tipti eń qaýiptisi – oń rýldi kóliktermen joǵary jyldamdyqpen qalaaralyq joldarda júretinderdiń oryndaýyna jol berilip otyr.
Keıbir agregatorlar sapardyń naqty quny týraly aqparat bermeıdi, qolma-qol aqshasyz tólem jasaý múmkindigi joq.
Tehnologııalyq múmkindikter bola tura, agregatorlar kóliktiń jyldamdyǵyn, qozǵalysyn, marshrýttan aýytqýyn baqylamaıdy. Bul da jolaýshylardyń qaýipsizdigine qater tóndiredi», dedi E.Sabyrjanuly.
Depýtat sondaı-aq keıbir servısterdiń qosymshalarynda jedel qyzmetterdi shaqyrý júıesi men klıentpen táýlik boıy baılanys ornatý múmkindigi qarastyrylmaǵanyn aıtty.
«Osylaısha, taksı qyzmetin kúndelikti paıdalanatyn mıllıondaǵan azamat áleýetti qaýip-qaterge ushyrap otyr, al júrgizýshiler áleýmettik turǵyda qorǵalmaǵan kúıde qalyp otyr», dedi ol.
Osy máselelerge baılanysty E.Beısenbaev mynadaı sheshimder qabyldaýdy qajet dep sanaıtynyn aıtty.
«Birinshiden, qaıtalanýdy boldyrmaý úshin aqparattyq-dıspetcherlik qyzmet pen sıfrlyq servısterdiń fýnksııalaryn naqty ajyratý.
Ekinshiden, «Taksı júrgizýshisi» uǵymyn zańnamalyq turǵyda bekitip, onyń mártebesin, quqyqtary men mindetterin aıqyndaý. Taksı júrgizýshilerin tapsyrysty úshinshi tulǵalarǵa bermeı, jeke ózi oryndaýǵa mindetteý, sondaı-aq eń tómengi sanıtarlyq talaptardy saqtaý.
Úshinshiden, formaldy kúndelikti tekserýlerdiń ornyna mindetti turaqty medısınalyq tekserý engizý jáne medısınalyq baqylaýdy Densaýlyq saqtaý mınıstrliginiń aqparattyq júıelerimen ıntegrasııalaý arqyly avtomattandyrý.
Tórtinshiden, árbir sapar boıynsha jolaýshylar men júrgizýshilerdiń ómiri men densaýlyǵyn saqtandyrýdy agregatorlarǵa mindetteý.
Besinshiden, jolaýshylardy sapardyń naqty quny týraly habardar etý, jyldamdyqty, qozǵalysty, marshrýttan aýytqýdy baqylaý, júrgizýshi men kólik derekteriniń memlekettik derekqorlar arqyly sáıkestigin tekserý», dedi depýtat.
Elnur Beısenbaev depýtattyq saýalynyń sońynda, «AMANAT» partııasy fraksııasynyń depýtattary tıisti zańnamalyq ózgeristerdi ázirleýge jan-jaqty qoldaý kórsetýge daıyn ekenin jetkizdi.