Qarýly kúshterdiń áskerı avıasııalyq bazalarynda qazaqtyń uly perzenti, Keńes Odaǵynyń Batyry Baýyrjan Momyshulynyń týǵanyna 115 jyl tolýyna oraı aýqymdy oqý-jattyǵý ushýlary ótti. Basty ereksheligi – áýe kemeleriniń Astana, Taraz, Balqash, Jetigen, Qaraǵandy, Shymkent, Taldyqorǵan, Aqtaý qalalaryndaǵy áskerı áýeaılaqtardan bir mezette kókke kóterilýi boldy, dep jazady Egemen.kz.
Jeke quram dańqty qolbasshy Baýyrjan Momyshulynyń rýhyna bir mınýt únsizdikpen taǵzym etti. Batyrdyń 115 jyldyǵyna oraı ushýlardy basqarý pýnktinde Volokolamsk túbindegi shaıqasqa qatysqan jaýyngerdiń ómir joly men erlik isterine arnalǵan estelik burysh bezendirildi.
Qorǵanys mınıstrliginiń málimetinshe, ushýlarǵa S-295, Sý-30SM, Sý-27, L-39S ushaqtary, Mı-17, Mı-35, Mı-171 tikushaqtary, sondaı-aq ANKA ushqyshsyz ushý apparaty tartylǵan. Oqý-jattyǵý ushýlary shtattyq rejımde ótip, qoıylǵan barlyq mindetter tolyq kólemde oryndaldy.
«Bul ushýlarǵa qatysý – árbir áskerı ushqysh úshin úlken mártebe ári zor jaýapkershilik. Oqý-jattyǵý sabaqtaryn Baýyrjan Momyshulynyń esimimen baılanystyra otyryp, biz onyń Otan aldyndaǵy eńbegine tereń qurmetimizdi bildirdik. Onyń ómirlik qaǵıdalary men adamgershilik ósıetteri áskerı qyzmetshiler úshin rýhanı baǵdar men moraldyq tirek», dedi Áskerı-áýe kúshteri qolbasshysynyń orynbasary polkovnık Medet Ásketaev.
Eske salaıyq, qazir Ulttyq ulan qatarynda Baýyrjan esimdi 249 áskerı qyzmetshi Otan aldyndaǵy boryshyn ótep júr.