eLicense.kz portalynda ruqsat berý qujattary men lısenzııalardyń merzimi aıaqtalýǵa jaqyndaǵanyn aldyn ala eskertetin jańa SMS-habarlama qyzmeti iske qosyldy. Júıe qujattyń qoldanylý merzimi bitýine 30 kún qalǵanda paıdalanýshyǵa avtomatty túrde habarlama jiberedi, dep habarlaıdy Egemen.kz.
Buǵan deıin azamattar men kásipkerler qujattardyń merzimin ózderi baqylap otyrýǵa májbúr bolatyn. Al jańa servıs memlekettik qyzmettermen jumys isteýdiń tıimdiligin arttyryp, merzimniń ótip ketýinen týyndaıtyn táýekelderdi azaıtady.
SMS-habarlamalar qoldanylý merzimi belgilengen ruqsat berý qujattary men lısenzııalarǵa qatysty qyzmetter úshin ǵana qarastyrylǵan. Habarlamalar elektrondyq úkimettiń SMS-shlıýzi arqyly 1414 qysqa nómirinen resmı eskertý bolyp jiberiledi.
Habarlama ótinish berý kezinde kórsetilgen telefon nómirine joldanady. Nómirdiń durystyǵy mobıldi azamattar bazasymen (BMG) aldyn ala tekseriledi. Osy tetik arqyly paıdalanýshylar óz qujattaryn ýaqytynda jańartyp, qyzmetiniń toqtap qalýyna jol bermeıdi.
Sonymen qatar portalda ruqsat berý qujattaryn proaktıvti formatta qaıta rásimdeý múmkindigi bar. Bul rásim paıdalanýshynyń jeke derekteri nemese uıym ataýy ózgergen jaǵdaıda avtomatty túrde, memlekettik organdardyń qatysýynsyz júzege asyrylady. Proaktıvti format pestısıdterdi tirkeý, tuqym óndirýshilerdi attestattaý, ekologııalyq ruqsattar berý jáne senimdi baǵdarlamalyq qamtamasyz etý tizilimine qatysty birqatar memlekettik qyzmetterge qoldanylady.
Jańa qyzmet Jasandy ıntellekt jáne sıfrlyq damý mınıstrliginiń Memlekettik qyzmetter komıteti men «Ulttyq aqparattyq tehnologııalar» AQ-nyń birlesken jumysynyń nátıjesinde iske asyryldy.